Qadın məşqçi: "Qarşılaşdığım ən böyük problem müsəlman ənənəsinə əsasən qızların erkən yaşda ərə getmələridir" - MÜSAHİBƏ

13:55 2 Aprel 2015

 19 və 21 yaşadək qızlardan ibarət Azərbaycan yığmalarının baş məşqçisi Patrisia Qonzales İspaniya mətbuatına müsahibə verib. 


 

Sportarena.az xəbər verir ki, ispaniyalı mütəxəssis Azərbaycanda qadın futbolunun hazırkı durumu, ölkəmizdə üzləşdiyi çətinliklər haqda danışıb.



- Məşqçi işləmək üçün 25 yaşınızda Azərbaycana getdiniz. Bu addımı atmağınıza səbəb nə idi?

- İlk ilimdə müəyyən çətinliklərlə üzləşdim. Çünki yeni ölkəyə uyğunlaşmalı idim. Ancaq gələcək karyeram baxımından İspaniyada qalmağın mənası yox idi.
 
 

- İspaniyada futbolla məşğul olmaq nə dərəcədə çətindir?

- Orada müxtəlif işlərlə məşğul olurdum, günün sonunda isə futbola gedirdim. İspaniyada futbolla məşğul olmaq qadınlar üçün asan deyil. Amma artıq bu işlə peşəkar səviyyədə məşğul oluram.
 
 

- Azərbaycan həyatına uyğunlaşmaqda hansı çətinliklə üzləşdiniz?

- İlk növbədə yaxşı mənada təəccübləndim. Azərbaycan müsəlman ölkəsi olsa da, qapalı ölkə deyil. Qadınlar da qapalı geyinmirlər. Müəyyən çətinlik olub. Bir dəfə yuyucu tozu və şampunun harada olduğunu müəyyənləşdirmək üçün yarım saat vaxt sərf etdim. Azərbaycanda futbolun necə başa düşüldüyünü və burada həyatın necə olduğunu artıq bilirəm. Çətin də olsa, yerli dili öyrənməyə çalışıram. Hər dəfə İspaniyadan Azərbaycana qayıdanda özümlə 20 kiloqram ərzaq, əsasən də, kolbasa aparıram. Hansı ki, Azərbaycanda yoxdur. 
 
 

- Azərbaycana köçdükdən sonra nəyi kəşf etdiniz?

- Texniki və taktiki tərəfdən hazırlıqlı olan bir neçə futbolçu ilə rastlaşdım. Bu ölkədə qadın futbolu 2010-cu ildən inkişaf etməyə başlayıb. Orada özümü çox rahat hiss edirəm. AFFA-nın baş katibi bildirib ki, Azərbaycanda qadın futboluna həmişə qadın rəhbərlik edəcək.
 
 

- Azərbaycanlı qadın futbolçunun əsas problemi nədi?

- Azərbaycanlı qadın futbolçu 16-17 yaşlı yeniyetmədir. O, yalnız futbol haqda düşünür. Qarşılaşdığım ən böyük problem müsəlman ənənəsinə əsasən qızların erkən yaşda ərə getmələridir. Bu səbəbdən də çoxu 21-22 yaşında karyerasını bitirir. Azərbaycan dilini bilməmək də mənə çətinlik yaradır.
 
 

- Bəs futbolçularla necə ünsiyyət qurursunuz?

- Onlar ingiliscə danışa bilmirlər. Buna görə də, tərcüməçinin köməyindən istifadə edirəm. Yeri gəlmişkən, tərcüməçim də "Bakı"nın sabiq baş məşqçisi Milinko Pantiçin tərcüməsiçi işləyib. Artıq o da futbolu yaxşı anlayır. Yəni futbol adamıdır.
 
 

- Nə vaxtsa, məşqçilik karyeranızı İspaniyada davam etdirməyi planlaşdırırsınızmı?

- Mən bu arzu ilə yaşayıram. Çox istərdim ki, öz ölkəmin qadın futbolunda tanınmış məşqçilərdən olum. Belə bir şans yaransa, qəbul edərəm.

 


Digər xəbərlər

Xəbər xətti