"Qəbələ" klubunun futbolçusu Aleksey Qay Avropa Liqasının qrup mərhələsinin ilk turunda evdə PAOK-la 0:0 bərabərə qaldıqları oyundan sonra jurnalistlərin suallarını cavablandırıb.
- Qrupun ilk matçında PAOK-la bərabərə qaldınız. Oyunla bağlı fikirlərini öyrənək...
- İlk dəfə idi qrup mərhələsində oynayırdıq. Komanda olaraq layiqli mübarizə apardıq. Qalib də gələ bilərdik. Ancaq düşünürəm ki, azarkeşlərimiz oyunumuzdan razı qaldı.
- Səncə, qələbə qazanmaq üçün nə çatmadı?
- İlk hissədə oyunumuz alınmadı. Emosiyalarımıza sahib çıxa bilmirdik. Ancaq ikinci hissədə daha yaxşı oynadıq və qollar vurmaq üçün şanslarımız oldu. Təəssüf ki, yararlana bilmədik.
- "Qəbələ"nin iki xal itirdiyini söyləmək olar?
- Məlum məsələdir ki, qol vurmaq üçün şanslarımız oldu. Lakin qalib gəlmədiyimiz üçün üzülməyə dəyməz. Əksinə optimist olmalı və növbəti oyunlarımıza hazırlaşmalıyıq.
- "Qəbələ"nin Premyer Liqa və Avropa Liqasında fərqli heyətlə çıxış etməsi komandanın oyununa mənfi təsir göstərmir ki?
- Xeyr, bunun komandaya mənfi təsir etdiyini düşünmürəm. Əksinə yaxşı və geniş heyətə malik olmağımız futbolçuları daha böyük yüklənmədən xilas edir.
- Yeni komanda yoldaşın Derlis Meza Kolli ilə meydanda anlaşmağın necə alındı?
- Derlis yaxşı futbolçudur. O, meydanda nəyi necə etmək lazım olduğunu yaxşı bilir. Digər oyunçular kimi o da komandaya kömək etmək üçün gəlib.
- Hücumları məntiqi sonluqla başa çatdıra bilmirdiniz. Bu, nə ilə bağlıdır?
- Hücumda bir qədər soyuqqanlı və sakit oynamaq lazımdır. Görünür bunun üzərində daha çox çalışmalıyıq. Əgər belə etsək, hər şey yaxşı olacaq.