Rusiyanın U-21 yığmasının Azərbaycan əsilli hücumçusu Ramil Şeydayev AÇ-2017-nin seçmə mərhələsi çərçivəsində Bakıda millimizə qarşı keçirdikləri oyundan (0:3) sonra azerisport.az saytının suallarını cavablandırıb. Sportarena.az həmin müsahibəni təqdim edir:
- Komandanızın belə məğlubiyyətinə nə səbəb oldu?
- Sadəcə, bizim oyunumuz alınmadı. Bu cür məğlubiyyətin əsas günahı özümüzdədir.
- Hesab oyuna görə oldu?
- Bizim qol vəziyyətlərimiz oldu. Onları dəyərləndirə bilsəydik, hesab fərqli ola bilərdi.
- Bütövlükdə, Azərbaycan yığması qələbəyə layiq idi, ya komandamızın bəxti gətirdi?
- Bu suala cavab verə bilmərəm.
- Hazırda "Rubin"də icarə əsasında çıxış edirsiniz. Gələcək üçün hansı planlarınız var?
- Demək çətindir. Hələ ki, "Rubin"dəyəm. Hər şeyə yaxın gələcəkdə aydınlıq gələcək.
- AFFA rəsmiləri sizi Azərbaycan yığmasına dəvət etdiklərini, amma qəbul etmədiyinizi deyirlər. Bu, sizin Azərbaycan yığmasının formasını geyməyi arzulamadığınızdan xəbər verir?
- Bəli, məni Azərbaycan yığmasına dəvət ediblər. Amma qalan məsələlər barədə danışmaq istəmirəm.
- Əvvəllər Aleksandr Səmədova da oxşar təklif göndərilmiş, amma o, Rusiya yığmasını seçmişdi. Sizcə, o, düzgün qərar verib?
- Bilmirəm. Bu, Səmədovun qərarıdır. Onun öz həyatı var, mənim öz həyatım.
- Tarixi vətəninizin yığmasında oynamaqla bağlı valideynlərinizlə söhbət etmisiniz?
- Bəli, onlarla Azərbaycan yığması barədə söhbətimiz olub. Amma söhbətimizin detallarını açıqlamaq istəmirəm. Gələcək göstərəcək.