Avropa Liqasının birinci təsnifat mərhələsi çərçivəsində bu gün keçiriləcək “Baltsan” – “Neftçi” oyunundan əvvəl mətbuat konfransı təşkil olunub.
Sportarena.az klubun rəsmi saytına istinadən xəbər verir ki, “Neftçi”nin baş məşqçisi Vəli Qasımov görüş haqda fikirlərini bildirib:
“Bizi çətin oyun gözləyir. Rəqib haqda məlumat toplamışıq, zəif komanda deyil. Hücumçuları xoşumuza gəldi, Malta milli komandasının üzvüdür. Orta xəttdə də yaxşı futbolçuları var. Sadə futbol oynayırlar və nəticə qazanırlar. Bununla belə, istəyirik burada yaxşı oyun göstərib ilk mərhələni biz keçək. Yeni transferlərimiz var, onların oyununu bəyənib komandaya cəlb etmişik. Düzdür, düşərgəyə yeni qoşulublar, amma hesab edirəm ki, bu qısa müddət ərzində komandaya uyğunlaşa biliblər”.
Vəli Qasımovla yanaşı “Neftçi”nin yarımmüdafiəçisi Elşən Abdullayev də jurnalistlər önünə çıxıb: “Bakıda da, demək olar, havanın temperaturu bura ilə eynidir, havaya görə çətinlik yaşayacağımıza inanmıram. İnanıram ki, komanda şəklində yaxşı oynayıb sərfəli nəticə qazanacağıq”.