Bu gün UEFA Avropa Liqasında “Qəbələ” ilə yanaşı, “Neftçi” də ilk oyununu keçirəcək. Bir neçə gün bundan öncə matçın Malta televiziyası ilə yayımlanmaması səbəbindən CBC Sport-un da bu qarşılaşmanı azarkeşlərə təqdim edə bilmədiyini məlumat vermişdik.
Saytımıza açıqlama verən CBC Sport-un baş direktoru Volkan Üst vəziyyətin dəyişdiyini bildirib: “Dünən bəlli oldu ki, “Baltsan” – “Neftçi” oyunu yerli televiziya ilə yayımlanacaq. Hazırda Maltada olan “Neftçi” klubunun rəhbərliyi danışıqlar apararaq, bir növ bizə kömək oldular. Buna görə, “Neftçi” rəhbərliyinə təşəkkür edirəm. Bildiyiniz kimi, “Baltsan” – “Neftçi” qarşılaşması Bakı vaxrı ilə saat 20:00-da başlayacaq. “Qəbələ” – “Samtredia” görüşü isə saat 21:00-də start götürəcək. Bu səbəbdən də “Baltsan” – “Neftçi” oyunu saat 20:00-dan etibarən CBC İnternational kanalı ilə canlı yayımlanacaq. CBC İnternational televiziyasının rəhbərliyinə də təşəkkür edirəm ki, bələ məqamda bizə yardım etdilər. Bir sözlə, “Neftçi” sevərlər komandamızın səfər oyununu izləmək imkanı əldə edəcəklər. Bir daha “Neftçi” və “Qəbələ”yə bu günkü oyunlarda uğurlar arzu edirəm”.