Şəhriyar Məmmədyarov: "Fiqurları insanlardan yaxşı tanıyıram"

Sportarena.az      27 Avqust 2018, 16:10

Azərbaycanın məşhur şahmatçısı Şəhriyar Məmmədyarov Bakı Şahmat Olimpiadasının rəsmi facebook səhifəsində izləyicilər tərəfindən verilən sualları cavablandırıb.


Sportarena.az xəbər verir ki, Bakı Şahmat Olimpiadasının mətbuat xidməti ən maraqlı sual və cavabları təqdim edir.


- Bakı Şahmat Olimpiadası ərəfəsində həyəcan varmı?

- Həyəcan hər zaman var. Bakıda keçirilən hər bir yarış bizim üçün böyük sınaqdır.


- Sonuncu dəfə bacılarınla nə vaxt şahmat oynamısan? Ailə üzvlərinlə oyunlarda sonuncu məğlubiyyətini necə xatırlayırsan?

- Təlim-məşqlərlə əlaqədar evdə az oluram. Amma sonuncu dəfə ailə üzvlərimlə görüşlərdə Türkanla məğlubiyyəti xatırlayıram. Ona uduzmuşdum. Amma Zeynəb məni turnirdə məğlub edib. Evdə rahat oynayırıq, amma yarışda sərbəstlik olmur. Ona görə Zeynəbin qələbəsini unutmamışam.


- Tələbələriniz varmı?

- Tələbələrim yoxdur. Çünki, konkret məşqçilik etməyə vaxt olmur.


- Sizə görə tarixdə oynanılmış ən maraqlı oyun?

- Şahmatda maraqlı oyunlar çoxdur. Mənim üçün ən maraqlı oyunlardan biri Veyk-An-Zee turnirində Veselin Topalovla Harri Kasparov arasında olmuşdu.


- Şahmatda kumirin kim olub?

- Güclü şahmatçılar çox olub. Konkret kimisə özümə kumir seçməyim yadıma gəlmir. Amma ən güclülərdən öyrənməyə çalışmışam.


- Sizcə tarixin ən güclü şahmatçısı kim olub?

- Bobbi Fişeri qeyd edə bilərəm. Onun partiyaları indiyə qədər öyrənilir. Eyni zamanda, Harri Kasparovun adını çəkmək olar. Hər dövrün öz güclüsü var.


- Şəhriyarın uğurunun sirri nədədir?

- Çox məşq etmək lazımdır. Bütün istirahətləri qurban verəndə uğur özü gəlir. Çox çalışmaq lazımdır. Yaxşı hazırlaşanda, bütün fikir oyuna yönələndə nəticə yaxşı olur. Uğurun sirri zəhmət çəkməklə əlaqədardır. Zəhmət olan yerdə nəticə hər zaman özünü göstərir.


- Şahmatçı olmasaydınız, hansı peşəylə məşğul olardınız?

- Yəqin ovçu olardım. Ov etməyi çox sevirəm. Vaxt olanda dostlarla ova gedirik.


- Asudə vaxtlarınızı necə keçirirsiniz?

- Son zamanlar asudə vaxtım olmur. İmkan tapanda dostlarla görüşürük. Təbiəti çox sevirəm. Ailə üzvlərimlə istirahət etməyi çox xoşlayıram.


- İnsanları da fiqurlar kimi yaxşı tanıyırsınız? Yəni, insanlarla fiqurları müqayisə etmək olar?

- Fiqurları insanlardan yaxşı tanıyıram (gülür). İnsanlar bəzən çox tez-tez dəyişir. Amma onları fiqurlarla müqayisə etmək istəməzdim. İnsanları daha çox at və ya vəzirə oxşadardım. Oyunun ortasında at elə gedişlər edir ki, adam təəccüblənir. Vəzir fərqli gedişlərlə oynamağı bacarır. İnsanlar dəyişkən olduğu üçün vəzirin oyununa oxşayır.


- Olimpiadanın rəsmi maskotu Şah Oğlanı sənə oxşadırlar. Onunla münasibətin necədir?

- Şah Oğlan uğurlu seçimdir. Şən obrazdır. İki həftə əvvəl ticarət mərkəzində görəndə onunla şəkil çəkdirmişəm. Çox şən oğlandır. Bəziləri onu mənə oxşadır. Çünki, şahmatda mənə qısaca olaraq Şah deyirlər. Özüm oxşarlıq görmədim. Amma maskotun olması yaxşıdır. Şahmatın təbliği üçün belə layihələr önəmlidir.


- Azərbaycan millisinin Bakı Şahmat Olimpiadasında şanslarını necə qiymətləndirirsiniz?

- Şans həmişə var. Oynamaq lazımdır. Komanda kimi mübarizə apararaq mükafatçılar sırasına düşmək üçün sona qədər yarışmaq lazımdır.


- Azərbaycanda gənc şahmatçıların əldə etdiyi nəticələrdən razısınız? Qrossmeysterlərdən kimin adını çəkə bilərsiniz.

- Yeniyetmələr hər zaman bizi sevindirib. Gənclər də müəyyən mənada həmişə uğurlu çıxış edirlər. Fərqləndirmək istəməzdim. Hamısına uğurlar arzulayıram. Çox istedadlı uşaqlar var. Nəticələrə baxarkən şahmata olan marağı hiss edirsən. Ölkəmizdə şahmata həqiqətən böyük maraq var. İstəyirəm gənclər daha çox çalışsınlar, tezliklə yığma səviyyəsinə ucalsınlar.

DİGƏR XƏBƏRLƏR
XƏBƏR LENTİ
ÇOX OXUNANLAR
SORĞU
Premyer Liqada mövsümün gedişindən razısızmı?
 Razıyam
 Normaldır
 Narazıyam
 Maraqlanmıram
ARXİV
 jQuery UI Datepicker - Display inline
Copyright © 2018 Sportarena.az
Sayt Five Agency tərəfdən hazırlanmışdır

Ən son idman xəbərlərini səhifəmizdən də izləyin