"Rio-2016" Paralimpiya oyunlarında Azərbaycan millisi ilk qızıl medalını qazanıb. 73 kq çəkidə mübarizə aparan cüdoçumuz Ramil Qasımov turniri qələbə ilə başa vurub. Mübarizəyə 1/4 final mərhələsindən başlayan idmançımızın ilk rəqibi kubalı Cerardo Rodrigez olub. İlk görüşdə inamlı qələbə qazanan Ramil yarımfinalda almaniyalı Nikolay Kornhassı məğlub edib. Finalda isə ukraynalı Dmitro Soloveyi ipponla məğlub edən Qasımov Paralimpiya Oyunlarında millimizə ilk qızıl medalını qazandırıb.