Azərbaycan Beynəlxalq Bankı (ABB) daha bir idman qurumu ilə əməkdaşlığı dayandırıb.
Sportarena.az xəbər verir ki, bu, Azərbaycan Milli Karate Federasiyasıdır. Bank baş sponsoru olduğu federasiya ilə müqavilə müddətini artırmayıb.
AMKF-in I vitse-prezidenti Rəhman Həsənov "Report"a açıqlamasında bildirib ki, sponsorluğun davam etdirilməsi ilə bağlı onlara heç bir rəsmi məlumat verilməyib: "Hələ cavab gözləyirik. Baş sponsor yanvarın 1-dən maliyyə vəsaiti ayırmır. İdmançılarımız Fransada keçirilən I Premyer Liqa yarışına da Gənclər və İdman Nazirliyinin hesabına yollanıb".
Bankın mətbuat xidmətindən "Report"a tərəflər arasındakı müqavilə müddətinin 2016-cı il dekabrın 31-də başa çatdığı və yeni müqavilənin imzalanmadığı bildirilib:
"Bu, ABB-nin sağlamlaşdırılması çərçivəsində atılan addımlardan biridir".
Qeyd edək ki, yanvarın 27-də ABB-nin İdarə Heyəti "İnter” Peşəkar İdman Klubuna da sponsorluğun dayandırılmasına qərar verildiyini açıqlayıb.