Azərbaycan Premyer Liqasının XXV turunda baş tutan “Qarabağ” - “Qəbələ” (0:0) oyununu izləyənlər arasında K-1 döyüşçüsü Zabit Səmədov da var idi.
Sportarena.az xəbər verir ki, “Qarabağ”ın dəvəti ilə oyunu izləməyə gələn Səmədov matçdan sonra jurnalistlərin suallarını cavablandırıb:
- Futbollara baxmağa tez-tez gedirsən?
- Sözün açığı, Azərbaycanda ilk dəfə idi ki, futbola baxırdım. Oyunu izlədim, maraqlı alındı.
- “Qarabağ” azarkeşi olduğun şübhəsizdir. Oyunu izləməyə kimin dəvəti ilə gəlmişdin?
- “Qarabağ” rəhbərliyi məni dəvət etmişdi. Bildiyiniz kimi, “Qarabağ”ı dəstəklədim. “Qarabağ” soz zamanlar ölkəmizi Avropada yüksək səviyyədə təmsil edir. İnşallah bunun davamı gələcək.
- Ümumiyyətlə, Bakıda nə qədər qalacaqsan? Və bu komandalar arasında mayın 5-də kubokun finalında baş tutacaq oyunu izləyəcəksənmi?
- Yox, o qədər Bakıda qalmayacam. İnşallah, avrokubok oyunlarında Bakıya qayıdacam. Həmin vaxt həm "Qəbələ"yə, həm "Qarabağ"a, həm də digər klublara dəstək olacam.
- Millimizin oyunlarını izləyirsən?
- Əlbəttə. Millinin oyunlarını xüsusilə izləyirəm. Azərbaycan bayrağı harda varsa, biz də ordayıq. Bayrağımızla qürur duyuruq.
- Hansı xarici klublara azarkeşlik edirsən?
- Düzü, azarkeş deyiləm. Amma gözəl oyunlara baxıram. Çempionlar Liqasının son finalını stadiondan izləmişəm. Çox təəssüf ki, həmin oyunda “Atletiko” uduzdu. Onlara azarkeşlik edirdim.