“Almeydanın Şimali İrlandiya ilə oyuna əsas heyətdə başlayıb-başlamayacağına qərar vermək üçün bir qədər gözləməliyəm”.
Sportarena.az xəbər verir ki, bu sözləri apasport.az-a açıqlamasında Azərbaycan millisinin baş məşqçisi Robert Prosineçki deyib. DÇ-2018-in seçmə qrup mərhələsi çərçivəsində Şimali İrlandiyanı qəbul edəcək yığmamız bu gündən Bakıda məşqlərini bərpa edib. Milliyə dəvət edilən “Qarabağ”ın yarımmüdafiəçisi Riçard Almeyda iyunun 10-da komandamızın heyətində debüt edə bilər. Prosineçki Braziliya əsilli futbolçunun yığmamıza xeyir verəcəyini düşünür:
“Onu deyə bilərəm ki, məşqlərdə özünü yaxşı tərəfdən göstərdi. Riçard peşəkar, öz üzərində çalışan, yaxşı futbolçudu. Artıq 5 ildi Azərbaycandadı. Oyunçuların hamısını tanıyır, özünü azərbaycanlı kimi hiss edir. Ölkəyə tam uyğunlaşıb. İnsan kimi də gözəl insandı. Çox maraqlı futbolçudu. Mənə elə gəlir ki, Azərbaycan millisinə xeyri dəyəcək”.