DÇ-2018-in seçmə mərhələsində sabah millimizin qonağı olacaq Şimali İrlandiya yığmasının baş məşqçisi Maykl O`Nil oyunöncəsi mətbuat konfransı keçirib.
Sportarena.az xəbər verir ki, irlandiyalı mütəxəssis jurnalistlərin suallarını cavablandırıb:
- Almaniya ilə oyuna baxdığınızı demişdiz. Bu oyundan nə gözləyirsiz?
- Azərbaycanın bütün oyunlarına baxmışam. Bu sualı siz mənə yox, Prosineçkiyə ünvanlamalısız. Çünki Azərbaycan millisinin hazırlığını o daha yaxşı bilər. Almaniyaya qarşı oyunun ilk 30-35 dəqiqəsində çox yaxşı mübarizə aparmışdız.
- Riçard Almeyda barədə də danışmışdız. Ondan çəkinirsiz?
- Onun “Qarabağ”dakı oyunlarını izləmişik. Bu, millidə ilk oyunu olacaq. Lakin bizim oyunçularımız Premyer Liqa klublarında oynayırlar. Fikrimcə, ona qarşı yaxşı mübarizə apara biləcəklər.
- Sabah Bakıda hava isti olacaq. Bu, komandanıza nə dərəcədə təsir edə bilər?
- Hava yaxşıdı. Türkiyədə də burdakı hava şəraiti kimidi. Bu bizə çox da böyük problem yaratmayacaq. Fikrimcə, öz oyunumuzu göstərə biləcəyik.
- Komandaların şanslarını necə dəyərləndirirsiz?
- Öz ölkəmizdə 4:0 hesabıyla qalib gəldik. Fikrimcə, bu oyundan da yaxşı nəticə ilə qayıtmaq üçün yaxşı şansımız var. Bundan əlavə, Azərbaycan son iki oyunda məğlub olduğundan, bu oyuna daha yaxşı hazırlaşacaq.
- Azərbaycan millisinin hansı oyunçularını fərqləndirə bilərsiz?
- Hansısa oyunçunu fərqləndirmək digər oyunçulara qarşı hörmətsizlik olardı. Ancaq komandada yaxşı oyunçulardan Dmitri Nazarovu fərqləndirərdim. Bundan əlavə, “Qarabağ”ın Çempionlar Liqasında “Seltik”lə matçında Rəşad Sadıqovun oyununu da çox bəyənmişdim.