"Qarabağ"ın vitse-prezidenti Tahir Gözəl Türkiyənin "Sabah" qəzetinə açıqlama verib.
Sportarena.az xəbər verir ki, o, Azərbaycan futbolunun tarixində ilk dəfə olaraq Çempionlar Liqasını qrup mərhələsində mübarizə aparacaq Ağdam klubunun uğurunun səbəbindən və digər məsələlər barədə danışıb.
T.Gözəl bugünkü səviyyəyə gəlmələrinin əsas səbəbinin səbr və sabitliyin olduğunu bildirib: "Qarabağ"la yanaşı, digər Azərbaycan klubları və ölkənin milli komandası son illərdə iştirak etdiyi turnirlərdə rəqiblərinə çətin anlar yaşadıb. Təbii ki bu nəticələrin davamlı olması bizim üçün çox önəmlidir. Lazım olan bütün işləri AFFA ilə iş birliyi nəticəsində görürük".
O, Qurban Qurbanovun "Qarabağ"a gəlişi ilə klubda yeni dönəm başladığını söyləyib: "2001-ci ildən "Qarabağ"ın rəhbərliyində çalışıram. İlk olaraq Türkiyədən Hamdi Serpil Tüzünlü ilə işləməyə başladıq. 2009-cu ilə qədər bizimlə birgə işləyən dəyərli məşqçimizin yetişdirdiyi futbolçular Azərbaycan klubları və milli komandalarda uğurlu çıxış etdilər. Baş məşqçimiz Qurban Qurbanovun 2008-ci ildə "Qarabağ"a gəlişi ilə klubda yeni bir dönəm başladı. Dalbadal 3 il Avropa Liqasının qrup mərhələsində mübarizə apardıq. Builki hədəfimiz Çempionlar Liqasının qrup mərhələsinə yüksəlmək idi və bunu da bacardıq. Heyətimiz daha yaxşını da edə biləcək birlik, bərabərlik və motivasiyaya sahibdir".
T.Gözəl Q.Qurbanovun Pep Qvardiolanın heyranı olduğunu söyləyib: "O, 2012-ci ilin əvvəlində "Barselona"nı ziyarət edərək Qvardiolanın yanında təcrübə keçib. Qurban Qurbanovun bu marağı səbəbindən Azərbaycan mediasında komanda "Qafqazın Barselona"sı ləqəbini alıb".