“Kəpəz”də yeni məşqçi təyinatları

10:31 19 Dekabr 2017

“Kəpəz” Peşəkar Futbol Klubunun əvəzedici heyətində və 19 yaşadək futbolçulardan ibarət komandasında məşqçi dəyişiklikləri olub.

 

Sportarena.az xəbər verir ki, əvəzedici heyətin baş məşqçisi Azər Məmmədov, köməkçisi Vasif Vəliyev, U-19 komandasının baş məşqçisi Ceyhun Əhmədov, köməkçisi Fuad İsmayılov ilə yollar ayrılıb. “Kəpəz” PFK-nın rəhbərliyi bu mütəxəssislərin hər birinə klubdakı fəaliyyətinə görə təşəkkür edib, gələcək işlərində uğurlar arzulayıb.

 

Klubdan gedən məşqçilərin yerinə artıq təyinatlar da olub. Əvəzedicilərin baş məşqçisi vəzifəsi Ceyhun Tanrıverdiyevə tapşırılıb. Mətləb Məmmədov onun köməkçisi təyin olunub. Xatırladaq ki, vaxtilə “Kəpəz”in şərəfini qorumuş hər iki mütəxəssis əvvəllər də Gəncə klubunda çalışaraq aşağı yaş qrupları üzrə komandalarda işləyiblər. Tanrıverdiyev 2015/2016-cı illər mövsümündə U-14, Məmmədov isə 2015/2016-cı illərdə U-15, növbəti il U-16 komandasının baş məşqçisi olub.

 

“Kəpəz”in U-19 komandasının baş məşqçisi postuna Anar Kələntərov gətirilib. İlqar Hüseynov onun köməkçisi olub. Gəncə futbol məktəbinin yetirməsi kimi ayrı-ayrı dövrlərdə “Kəpəz”in şərəfini qorumuş sabiq yarımmüdafiəçilərdən Kələntərov doğma klubunda iş təcrübəsinə malikdi. O, 2014/2015-ci illər mövsümündə əsas komandada məşqçi köməkçisi, eləcə də aşağı yaş qruplarında baş məşqçi çalışıb. İlqar Hüseynov isə ilk dəfə doğma klubunda məşqçilik fəaliyyətinə başlayıb.


Xəbər xətti