Ruslan Qurbanov "Qəbələ"dəki davanın səbəbini danışdı, Ayxan Abbasovdan üzr istədi - FOTO

Sportarena.az      23 Fevral 2018, 12:21

Hesabat turu səs-küylü alındı. Qəbələdə xeyli səs-küy qopdu, “Qəbələ” – “Zirə” görüşündə Roman Qriqorçukun köməkçisi Sənan Qurbanovun tribunaya göndərilməsi, qarşılaşma başa çatandan sonra iki komandanın futbolçuları arasında yaşanan qalmaqal, “Zirə”nin baş məşqçisi Ayxan Abbasovun meydan sahiblərinin mühafizəçisi tərəfindən vurulması ciddi ajiotaja səbəb oldu.

 

Sportarena.az xəbər verir ki, daha bir məqamı Ayxan bəy mətbuat konfransında qabartdı. Futbolçularla bağlı insidentdən danışarkən, Ruslan Qurbanovun oyunboyu söyüş söyməsini dilə gətirməsi ciddi siqnal idi.


Qurbanovu onsuz da çılğın futbolçu kimi tanıyırıq. Belədə Abbasovun milli üzvünün ünvanına səsləndirdiyi fikirlər təəccüblü görünə bilməz. Bir tərəfi dinləyiriksə, digər tərəfin də fikirlərinə yer verməliyik. Odu ki, Ruslan Qurbanovu arayıb, nələrin baş verdiyini öz dilindən eşitmək istədik. “Qəbələ”nin futbolçusu olayı nəql etməklə yanaşı, Sadio Tounkaranın bilərəkdən ona yetirdiyi xəsarətin şəklini də çəkib göndərdi:

 

“Tounkara meydana daxil olan kimi bilərəkdən yan əzələmə vurdu. İndiyə qədər də həmin yerdən qan gəlir. Hər halda, özüm də futbolçuyam, təsadüfən yetirilən xəsarətlə bilərəkdən vurulan zərbəni ayırd edə bilirəm. Bundan az sonra yenə bilərəkdən, bu dəfə topuğumu tapdadı. Yaxınlaşıb ingilis dilində ondan ehtiyatlı oynamağı xahiş etdim. O isə cavabında mənə söyüş söydü. Söyüşü eşidəndən sonra ona beşqat artıq cavab qaytardım. Ola bilsin, Ayxan müəllim həmin söyüşü eşidib və onu nəzərdə tutub. O məndən yaşda da, vəzifədə də böyükdü. Buna görə başqasından yox, sırf Ayxan Abbasovdan üzr istəyirəm. Yenə deyirəm ki, vəziyyəti bu həddə Tounkara çatdırdı. Bilirdi ki, sarı vərəqəm var, mən də xaraktercə çılğınam. Bilərəkdən ayağıma vururdu ki, onun təxribatına uyub mən də onu vurum. Mən isə buna getmədim, əsəblərimi cilovladım. Sadəcə, söyüşünə söyüşlə cavab verdim. Ayxan müəllimin dediklərindən sonra hamı məni günahkar bilir. Halbuki mən heç də oyunboyu söyüş söyməmişəm. Elə etsəydim, ilk növbədə Roman Qriqorçuk mənə xəbərdarlıq edərdi. Videoçəkiliş var, baxsınlar və sübut etsinlər ki, harda əvvəldən sona qədər söyüş söymüşəm. Uşaq deyiləm və yaxşı bilirəm ki, qarşılaşma canlı yayınlanır. Hər dəfə söyüş söysəm, epizodların birində kadra düşəcək. Bu da milli üzvünə başucalığı gətirmir. Yenə deyirəm, məni bilərəkdən vuran, bu azmış kimi üzümə söyən Tounkaraya bir dəfə o şəkildə cavab qaytarmışam, vəssalam. Yaxşı olar ki, Ayxan Abbasov Tounkaranın etdiklərinə və dediklərinə də baxsın. Özü də futbolçu olub, onda məni başa düşər”. ("Futbol plus" qəzeti)

 

DİGƏR XƏBƏRLƏR
XƏBƏR LENTİ
ÇOX OXUNANLAR
SORĞU
Avrokubokların yeni formatında klublarımızdan ən azı biri qrup mərhələsinə vəsiqə qazana biləcəkmi?
 Bəli
 Xeyr
 Püşkdən asılı olacaq
 Klublarımızın işi çətin olacaq
ARXİV
 jQuery UI Datepicker - Display inline
Copyright © 2018 Sportarena.az
Sayt Five Agency tərəfdən hazırlanmışdır

Ən son idman xəbərlərini səhifəmizdən də izləyin