Futbol üzrə milli komandamızın yoxlama oyunundakı rəqibi Belarus yığması oyun alqı-satqısında ittiham olunur.
Sportarena.az xəbər verir ki, yığmanın ötən ilin noyabr ayının 9-da Ermənistana qarşı keçirdiyi görüşlə bağlı sübhələr yaranıb. Belə ki, Ermənistanın 4:1 hesablı qələbəsi ilə başa çatan görüşdə əmsallar anormal şəkildə hərəkət edib. Bu oyunla bağlı şübhələr olduğunu danışılmış oyunlarla bağlı nümayəndəlikdən də təsdiq ediblər. Yığmanın baş məşqçisi İqor Kriuşenko isə yayılan xəbərlərə qısaca şərh verib:
"Bütün bunlar şayiədi. Cəfəngiyatı şərh etməyə ehtiyac görmürəm".
Belarus Futbol Federasiyasının mətbuat xidməti yayılan xəbərlərə münasibət bildirib:
"Federasiya yayılan xəbərlərə görə araşdırma aparmayacaq. Çünki yığmamız həmin matçda düzgün oynayıb. Ölkənin əsas komandasının nüfuzunu ləkələyən məlumatı yayanları məhkəməyə verəcəyik".
Qeyd edək ki, Belarus millisi martın 23-də Bakıda millimizlə yoxlama görüşü keçirəcək.