“Qarabağ”ın müdafiəçisi Elvin Yunuszadə Topaz Premyer Liqasının 22-ci turunda “Səbail”ə 1:0 hesabı ilə qalib gəldikləri oyundan sonra jurnalistlərin suallarını cavablandırıb.
Sportarena.az xəbər verir ki, o, əvvəlcə görüşlə bağlı fikirlərini dəyərləndirib:
- Çətin oyunlarımızdan birini keçirdik. Yanvardan bəri asan görüş olmayıb. Qalib gələ bildik. 3 xal bizim üçün vacib idi. Artıq növbəti oyunu düşünməliyik.
- Gec olsa da, bu barədə soruşmaq istərdik. Millidən kənarlaşdırılmağın və "Qarabağ”da əvəzedici heyətə göndərilməyinlə bağlı qərardan danışardın...
- Bu, haqlı qərar idi. Nə məsləhət gördülərsə, tabe oldum. Qurban müəllimlə də söhbətimiz oldu, hər şeyi qaydasına qoyduq. Söz verdim ki, belə səhvi təkrar etməyəcəm. O da məni anladı. Həmişəki kimi yanımda oldu.
- Milliyə dəvət alacaqsan?
- Artıq bunu Qurban Qurbanovdan soruşmaq lazımdır. Mən canla-başla hazırlaşmağa davam edəcəm. Qərarı isə baş məşqçi verəcək. Çağırmasa da, hörmətlə yanaşacam.
- İkinci dəfə Qurban Qurbanov səni bağışladı. Belə deyək, Allah üçüncüdən saxlasın?
- Hər şeydən öncə deyim ki, bunu bilərəkdən etmədim. Ancaq səhv səhvdir. İstəməyərəkdən olsa belə. Bunu boynuma alıram. Gərək 10 dəfə, hətta 100 dəfə diqqətli olum ki, səhvi təkrar etməyəm.
- Bir neçə epizodda səhvə yol verdin. Bu, həyəcanlı olmağınla əlaqəli idi?
- Sonuncu dəfə "Neftçi” ilə görüşdə oynamışdım. 4 həftəyə yaxın idi ki, meydanlara çıxmırdım. Gözlədiymdən hətta yaxşı çıxış etdim. Əvvəlki oyunlarda da səhv etmişəm. Amma bu matçdakı səhvlərim gözə görünməli idi ki, bunu da başa düşürəm.
- Bədavi Hüseynovun yoxluğunda daha çox oynayırsan. Artıq o, geri dönməyə hazırlaşır...
- Çox sevinirəm ki, geri dönür. Dostum və komanda yoldaşımdır. Bədavi olanda da çox oynamışıq. Buna ancaq sevinirəm.