Tərlan Əhmədovdan etiraf: "Niyə burada işləməyi boynuma götürərək, bu səhvi etdim?"

Sportarena.az      22 May 2018, 01:52

"Neftçi"nin baş məşqçisi Tərlan Əhmədov Topaz Premyer Liqasının mükafatlandırma mərasimindən sonra jurnalistlərin suallarını cavablandırıb. 

 

Sportarena.az həmin müsahibəni təqdim edir.

 

- Baş məşqçi kimi ilk medalınızı qazandınız. Hansı hissləri keçirirsiniz?

- Açığı, bəlkə də ilk dəfədir etiraf edirəm: "Neftçi"yə gəldiyim vaxt 2017-ci il sentyabrın 11-i idi. Sonra 2 gün də komanda ilə birgə oldum. Öz-özümə fikirləşdim ki, hara gəlmişəm? Niyə burada işləməyi boynuma götürərək, bu səhvi etdim? Çünki durum həddindən artıq acınacaqlı idi. Amma artıq iş işdən keçmişdi. Daxildə olan xaos, ayrıseçkilik, futbolçular, legionerlərin özləri arasında qruplaşmalar mövcud idi. Buna baxmayaraq, tədricən, səbrlə işimizi görməyə başladıq. Düzdür, üçüncü yeri tutmuşuq, amma bunun sevincini, ab-havasını indi hiss etdim. Hər oyundan sonra qələbə qazandıqca təzyiqlər, söz-söhbətlər üzündən o sevinci tam yaşaya bilmirdik. Lakin bu gün bu medal boynuma asılanda hiss etdim ki, mən də nəyəsə nail olmuşam və nədəsə əməyim var. Sadəcə, bunu bu gün hiss etdim. 

 

- Bürünc medal qazansanız da, yenə söz-söhbətlər var ki, Tərlan Əhmədov "Neftçi"də qalmayacaq. Əslində vəziyyət necədir və nə baş verəcək?

- Düzü, bilmirəm. Söz-söhbətlər həmişə olub və olacaq. Amma gördüyünüz kimi, qışdan sonra heç bir reaksiya vermədən, səbrlə, təmkinlə işimi davam etdirdim. Bilirdim ki, belə söz-söhbətlər olacaq. Olmasaydı belə, başqa söz-söhbətlər ortaya çıxacaqdı. Bunların hamısını tədricən arxada qoyduq. Lakin bu gün də bilmirəm necə olacaq. Çünki söz sahibləri klubun idarə heyətində yer alanlar, sponsorlardır. Hələlik sakitlikdir. Dünən son oyunumuzu keçirmişik, bu gün isə mükafatlarımızı almışıq. Hər halda yaxın günlərdə bəlli olar. 

 

- Postunuzda qalmamağınız sizə qarşı ədalətsizlik ola bilərmi?

- O barədə heç nə deyə bilmərəm. Hər halda işimiz bundan ibarətdir. Daim çamadanımız böyrümüzdə olur. Uğur da, uğursuzluq da olanda baş məşqçi yola salınır. Hər halda, istənilən qərarı normal qarşılayacağam.

DİGƏR XƏBƏRLƏR
XƏBƏR LENTİ
ÇOX OXUNANLAR
SORĞU
Avrokubokların yeni formatında klublarımızdan ən azı biri qrup mərhələsinə vəsiqə qazana biləcəkmi?
 Bəli
 Xeyr
 Püşkdən asılı olacaq
 Klublarımızın işi çətin olacaq
ARXİV
 jQuery UI Datepicker - Display inline
Copyright © 2018 Sportarena.az
Sayt Five Agency tərəfdən hazırlanmışdır

Ən son idman xəbərlərini səhifəmizdən də izləyin