Nazim Süleymanov: "Çalışacağıq ki, komandanı çempionata hazır vəziyyətə gətirək”

14:51 3 İyul 2018

“Sumqayıt”ın baş məşqçisi Nazim Süleymanov hazırlığın ilk mərhələsi ilə bağlı klubun rəsmi saytına açıqlama verib.

 

Sportarena.az xəbər verir ki, təcrübəli mütəxəssis “kimyaçılar”ın növbəti hazırlıq planları haqda da danışıb:

 

“Yeni mövsümün hazırlıqlarına 29-30 iyun tarixlərində dənizdə kross qaçışı ilə başladıq. İyulun 1-dən etibarən isə Azərbaycan Dövlət Bədən Tərbiyəsi və İdman Akademiyasının meydançasında toplu çalışmalara start verərək məşqləri davam etdiririk. Hazırlıqlara həm əvəzedici komandadan dəvət olunmuş futbolçular, həm də baxışda olanlar qatılıblar. Hələ ki, həmin futbolçuları gözdən keçiririk. İyulun 15-nə kimi toplanışın ilk mərhələsi davam edəcək. Bu mərhələdə iki yoxlama oyunu keçirməyi planlaşdırmışıq. Rəqiblərdən biri “Sabah” olacaq. İkinci oyun üçün isə axtarışlarımız davam edir. “Sabah”la iyulun 11-də üz-üzə gələcəyik. 14-də qarşılaşacağımız rəqibin kimliyinə isə yaxın günlərdə aydınlıq gələcək. İkinci yoxlama oyunundan sonra hazırlıq prosesinin 1-ci mərhələsi başa çatacaq. 2 günlük istirahətin ardından iyulun 16-sı Türkiyənin Bolu şəhərinə yola düşəcəyik. Orda hazırlığın 2-ci mərhələsi üçün təlim-məşq toplanışına start verəcəyik. Qonşu ölkədə olduğumuz müddətdə 4 yoxlama görüşü keçirməyi planlaşdırırıq. Çalışacağıq ki, toplanışın sonuna qədər komandanı çempionata hazır vəziyyətə gətirək”.


Xəbər xətti