“Keşlə”nin Topaz Premyer Liqasındakı qələbəsiz oyunlar seriyası qırılıb.
Sportarena.az xəbər verir ki, paytaxt təmsilçisi mövsümdə ilk 3 xalı 8-ci turun “Zirə”ylə qarşılaşmasında əldə edib - 1:0. Ardıcıl 6 oyunda qalib gələ bilməyən “Keşlə” sonuncu dəfə ötən mövsüm qələbə qazanmışdı. Mayın 20-də səfərdə “Səbail”i 1:0 hesabı ilə məğlub edən komanda növbəti uğurunu 154 gün gözləyib. Bununla da “Keşlə”nin ölkə çempionatları tarixindəki antirekord start seriyası qırılıb. Bakılılar 1999-cu ildə debüt etdiyi yarışda heç vaxt ilk qələbəsini belə gec qazanmamışdı.
Qeyd edək ki, “Keşlə”nin tarixində ümumilikdə ən uzun qələbəsiz oyunlar seriyası 11-ə bərabərdir. Bu, ötən mövsümün gedişində qeydə alınıb.