“Gərgin oyun oldu. Arıcıl iki oyundu 10 nəfərlə mübarizə aparırıq".
Sportarena.az xəbər verir ki, bu sözləri “Səbail”in baş məşqçisi Aftandil Hacıyev deyib.
Bayıl təmsilçisi Topaz Premyer Liqasının X turunda səfərdə “Zirə” ilə qolsuz heç-heçə edib.
Oyundan sonra baş tutan mətbuat konfransında iştirak edən çalışdırıcı fikirlərini bildirib: “Rəqib bizdən üstün oyun sərgilədi. Heyətimizdə zədəlilər var idi. Ağabala ilə Koçukun olmaması oyunumuza təsir etdi. Buna baxmayaraq, futbolçularımız yaxşı mübarizə apardılar. Hətta rəqibi cəzalandıra bilərdik. Ədalətli nəticə heç-heçə idi”.
- Ağabala Ramazanovun zədəsi ciddidir?
-Zədəsi ciddi deyil. Ancaq bu oyunu buraxmalı idi. Hazırda fərdi məşqlərlə kifayətlənir. İnşallah, bu həftə komanda ilə məşqlərə başlamalıdır.
- Oyunun gedişində zədələnən futbolçuların durumu necədir?
- İqor Korotetskinin zədəsi ciddidir. Lakin durumuna yekun tibbi müayinədən sonra aydınlıq gələcək. Ruslan isə gələn oyun bizimlə olacaq.
- Komanda 10 oyuna 6 qol vurub, ancaq üçüncü pillədə qərarlaşıb. Hücumçularınız zəif təsir bağışladığını düşünmürsünüz?
- Belə deyək, nədənsə texniki məğlubiyyətlərin günahını bizdə axtarırlar. Deməzdim ki, hücumçularımız zəifdir. Bəzən əks-hücumda, bəzən mövqe hücumlarında qollar vururuq. Elə rəqiblər var ki, birinci nömrə ilə oynamırıq.
- Qışda heyətdə hansı dəyişikliklər edəcəksiniz?
- Əgər bu mövqedə qala bilsək, güclənəcəyik. Ən azı 3 oyunçuya ehtiyacımız var. 2 futbolçumuz zədəli olanda, çətinlik çəkdiyimizi görürük. Ona görə də qışda heyətimizi gücləndirməliyik.