Xorvatiyanın Poreç şəhərində yeniyetmələr arasında cüdo üzrə Avropa çempionatının ilk günün görüşləri başa çatıb.
Sportarena.az xəbər verir ki, oğlanlar arasında -50 kq. çəki dərəcəsində Məhəmməd Məmişov təsəlliverici görüşdə ermənistanlı idmançı Qor Safaryan üzərində parlaq qələbə qazanaraq bürünc medalla yarışı başa vurub.
-55 kq. çəkidə Şahin Oruczadə finalda Serbiya təmsilçisi Matiya Yeremiklə gərgin keçən mübarizə nəticəsində qızıl medal qazanaraq çempionatın qalibi olub.
-60 kq. çəkidə Nizami İmranov final görüşündə macarıstanlı cüdoçu Adam Mayora qalib gələrək idmançılarımızın aktivinə ikinci qızıl medalı yazdırıb.
Qızlar arasında -48 kq. çəkidə yarışan idmançımız Aydan Vəliyeva isə çempionatın gümüş medalçısı olub.
İlk günün nəticəsinə əsasən cüdoçularımız çempionatda ümumi hesabda birinci yerdədir.