Futbol üzrə İspaniya kubokunda ikinci mərhələnin oyunları keçirilib.
Azərbaycan yığmasının yarımmüdafiəçisi Eddi İsrafilovun çıxış etdiyi "Kadis" də kubokda ilk sınağına çıxıb. Həmyerlimizin komandası "Levante" ilə qarşılaşıb.
Görüşün əsas vaxtı 1:1 hesabıyla başa çatıb. Tərəflər əlavə yarım saatda da qalibi müəyyənləşdirə bilmədiyindən penalti zərbələrinə ehtiyac duyulub. 11 metrlik zərbələri daha dəqiq yerinə yetirən futbolçumuzun komandası 3:2 hesabıyla qalib gələrək növbəti mərhələyə vəsiqə qazanıb.
İsrafilov da bu görüşün iştirakçısı olub. O, 73-cü dəqiqədə meydana çıxıb. 81-ci dəqiqədə isə sarı vərəqə ilə cəzalanıb.