"Bu gün AFFA rəhbərliyilə gələcəyimlə bağlı görüşəcəm".
Sportarena.az xəbər verir ki, bu sözləri millimizin baş məşqçisi Robert Prosineçki ölkəsinin mətbuatına açıqlamasında deyib. Xorvatiyalı mütəxəssis DÇ-2018-in seçmə mərhələsində Şimali İrlandiyaya 0:1 hesabı ilə uduzduqları oyundan sonra keçirilən mətbuat konfransında jurnalistlərlə arasında yaşanan kiçik insident barədə də danışıb:
"Adətən, ilk sual yenicə başa çatan oyun barədə olmalıdır. Amma mən mətbuat konfransına gələn kimi "Bursaspor"la bağlı sual verdilər. Onlar əvvəlcə məndən oyun, üzücü məğlubiyyət haqda yox, Türkiyəyə gedib-getməyəcəyimi soruşdular. İkinci, üçüncü suallar da eyni mövzuda oldu və özümdən çıxdım. Mən onlara dedim ki, istəyirsinizsə, gedə bilərəm".
Prosineçki millimizlə dekabra kimi müqaviləsinin olduğunu xatırladıb:
"Dünya çempionatının seçmə mərhələsinin sonuna qədər müqaviləm var. Əvvəlcə rəhbərliklə danışacam. Sonra hər şey müəyyənləşəcək".