“Kəpəz” yeni mövsüm üçün ilk məşqində komandanın yeni kapitanını müəyyənləşdirdi. Tural Axundovun gedişindən sonra boş qalan sarğını Şəhriyar Rəhimov daşıyacaq.
Sportarena.az xəbər verir ki, klubun saytına açıqlama verən Rəhimov kapitan seçilməsi ilə bağlı fikirlərini bölüşüb:
“Axundov kapitanı kimi komandaya çox fayda verirdi. O, tək oynadığı futbolla yox, həm də komandanı toparlamağı bacarması ilə seçilirdi. Tural böyük işlər görürdü, çalışacam ki, mən də layiqincə özümü doğruldum. Kapitan olmaq yalnız sarğını qolunda daşımaq deyil. Kapitan çətin vəziyyətdə hamıya dayaq durmağı bacarmalıdı, gənclərə örnək olmalıdı. Əvvəlcədən gurultulu danışmaq istəmirəm. “Kəpəz”ə xeyir verən kapitan olmağı qarşıya məqsəd qoymuşam. Ümumiyyətlə, bütün futbolçuların niyyəti komandaya kömək etməkdi".
Kapitan məşqçilərlə futbolçular, komanda ilə azarkeşlər arasında körpü, əsas ünsiyyət fiqurudu. Rəhimov da bu statusda kapitan olmaq istəyir:
“Mənə çox məsuliyyətli işi həvalə ediblər. Azarkeşlər qarşısında özümü doğrultmalıyam. Məşqçidən sonra nəticəyə cavabdeh kapitandı. Ona görə işin çətinliyini anlayıram. Üzərimə düşən vəzifənin öhdəsindən gəlməyə çalışacam. Söz verirəm ki, əlimdən gələnin ən yaxşısı “Kəpəz” üçün edəcəm. Yalnız oyunda deyil, meydandan kənarda da komanda üçün dəyərli olmalıyam. Kapitan körpü rolunu oynamalıdı. Futbolçuların sözünü məşqçiyə, azarkeşlərə çatdırmalıdı və əksinə”.
Şəhriyar Rəhimov sonda qarşıdakı mövsüm üçün azarkeşlərə səslənib:
“Ötən mövsüm ağır keçdi. Çempionatın sonunda daha yaxşı çıxış etdik. Məqsədimiz qarşıdakı çempionatda da azarkeşləri sevindirməkdi. Kapitan heç vaxt rahatlaşmamalıdı. Mən böyük vədlər verməyi xoşlamıram. Çünki sözü tutmayanda məyus olursan. Amma bir şeyi söz verə bilərəm ki, “Kəpəz” üçün sona kimi mübarizə aparacağıq. Fanatlar buna əmin ola bilərlər. Onları da əvvəlki kimi komandaya dəstək olmağa çağırıram. Biz onlardan güc alırıq”.