“Sumqayıt” 2017/18 mövsümü üçün hazırlığını davam etdirir.
Sportarena.az xəbər verir ki, hazırlıq prosesinin 2-ci mərhələsini Türkiyənin Bolu bölgəsində keçəcək komanda burada 4 yoxlama oyununda qüvvəsini sınayacaq.
Belə ki, “Sumqayıt” ilk olaraq, 17 iyul tarixində Super Liqa təmsilçisi “Osmanlıspor”la qarşılaşacaq. Qeyd edək ki, 1978-ci ildə yaradılmış klub 2014-cu ildən “Osmanlıspor” adını daşıyır. 2016/17 mövsümündə UEFA Avropa Liqasında çıxış etmiş komanda 1/16 final mərhələsində mübarizəni dayandırıb. Ötən mövsüm Türkiyə Super Liqasını 13-cü sırada tamamlayan Ankara təmsilçisinin heyətində Pyer Vebo 9 qolla komandanın ən məhsuldar futbolçusu olub.
"Sumqayıt" növbəti yoxlama oyununu 20 iyul tarixində Səudiyyə Ərəbistanın əsas liqa təmsilçisi “Al-Fateh” komandasına qarşı keçirəcək. 1958-ci ildə yaranmış klub son mövsümdə Səudiyyə Ərəbistanı Professional Liqasını 8-ci yerdə bitirib.
3-cü yoxlama görüşündə Samir Abasovun çalışdırdığı komanda 23 iyul tarixində Türkiyə təmsilçisi “Sivasspor”la qarşılaşacaq. 1967-ci ildə əsası qoyulan “Sivasspor” 2016/17 mövsümünü TFF 1. Liqasını lider olaraq tamamlayaraq, Super Liqaya yüksəlib.
Sumqayıtlılar son yoxlama oyununu isə 28 iyul tarixində Səudiyyə Ərəbistanı təmsilçisi “Al-Taavun”a qarşı keçirəcək. 1956-cı ildə qurulmuş Burayda təmsilçisi 2016/17 mövsümündə Səudiyyə Ərəbistanı Professional Liqasında 8-ci yeri tutub.