Cavid İmamverdiyev: "İnanıram ki, əvvəlki Cavidi görəcəksiniz"

Sportarena.az      22 Oktyabr 2018, 12:40

“Sabah” komandasının futbolçusu Cavid İmamverdiyev Sportarena.az-a müsahibə verib.

 

- Son 3 matçda qalib gələ bilməmişdiniz. Bu qələbəyə nəyin hesabına nail oldunuz?

- Düşünürəm ki, bu qələbə bizə çox vacib idi. Ən azından özümüzə gəlmək baxımından. Çünki 3 oyundur uda bilmirdik. Məqsədimiz, komandamızın planları var. Bu qələbəni klubun prezidenti Maqsud Adıgözəlova həsr edirik. Həm komanda yoldaşlarımı, həm də məşqçilər korpusumuzu təbrik edirəm. Şükürlər olsun ki, qələbəni qazandıq.

 

- Məqsədiniz nədir? Məlumdur ki, “Sabah” fəaliyyətinin 3 ili tamam olmadığı üçün avrokuboklarda çıxış edə bilməz...

- Bu, aydın məsələdir. Məlum səbəbdən bu mövsüm avrokuboklara düşə bilmərik. Bununla belə, nə qədər çox xal toplasaq, bir o qədər rahat olar. Əsas odur ki, Premyer Liqada qalaq. Məqsəd deyəndə, bunu nəzərdə tutdum.  Bu komandanın uğuru üçün ancaq canımızı qoymalıyıq, başqa yolumuz yoxdur. Mübarizə aparmalıyıq ki, qələbə qazana bilək. “Sumqayıt” da yaxşı komandadır. Belə rəqib üzərində qələbə qazandığımıza görə çox şadam.  

 

- Ötən mövsüm “Sumqayt”dakı çıxışınızla müqayisədə indi bir az fərqli mövqedə çıxış edirsiniz. Orada daha çox hücumda yer alırdınızsa, hazırda müdafiəyə kömək edirsiniz. Bu, baş məşqçiniz Elşad Əhmədovun göstərişidir, yoxsa öz seçiminizdir?

- Əlbəttə, baş məşqçinin göstərişidir. Mənin üçün fərqi yoxdur, baş məşqçi harda deyirsə, orda oynayaram. Hər məşqçi də eyni futbolu istəmir. Elşad müəllim məndən bu futbolu tələb edir. Mən də əlimdən gəldiyi qədər onun dediyini yerinə yetirməyə çalışıram.

 

- Ancaq “Sumqayıt”da daha ön planda görünürdünüz, qollar vururdunuz. Təsadüfi deyil ki, həmin vaxt adınız “Qarabağ”, “Neftçi”, “Qəəblə” kimi klublarla yanaşı çəkilirdi. İndi bir qədər kölgədə qalmağınız sizi narahat etmir?

- Yox! Düşünürəm ki, özümə gələcəyəm. Bildiyiniz kimi, təlim-məşq toplanışına da gec qatıldım. Toplanışdan qayıdandan sonra ardarda iki dəfə zədə aldım. İndi özümə gəlirəm. İnanıram ki, əvvəlki Cavidi görəcəksiniz.

DİGƏR XƏBƏRLƏR
XƏBƏR LENTİ
ÇOX OXUNANLAR
SORĞU
"Qarabağ" Avropa Liqasının qrupunda neçənci yeri tutacaq?
 1-ci
 2-ci
 3-cü
 4-cü
ARXİV
 jQuery UI Datepicker - Display inline
Copyright © 2018 Sportarena.az
Sayt Five Agency tərəfdən hazırlanmışdır

Ən son idman xəbərlərini səhifəmizdən də izləyin