"Qırmızı vərəqə və penalti hər şeyi alt-üst etdi".
Sportarena.az xəbər verir ki bunu "Səbail"in baş məşqçisi Şahin Diniyev evdə "Qəbələ"yə 0:1 hesabı ilə uduzduqları Azərbaycan Kubokunun yarımfinal mərhələsinin cavab oyunundan sonra mətbuat konfransında deyib.
57 yaşlı mütəxəssis ilk hissədə rəqibdən üstün futbol sərgilədiklərini bildirib:
"Kuboka xas oyun oldu. Meydanda hər şey var idi. Birinci yarıda üç qol epizodundan istifadə edə bilmədik. Rəqibin isə fasiləyədək qol vəziyyətləri olmadı. İkinci hissənin əvvəlində aldığımız qırmızı vərəqə bütün planları pozdu".
Bir çox matçda rotasiyalar etdiyini xatırladan Diniyev cavab oyununda da əsas heyətin 6 futbolçusunu meydana buraxmadığını söyləyib:
"Gücümüzü qorumaq üçün bu addımı atmışdıq. Düşüncəmiz belə idi kİ, 60-65-ci dəqiqələrə kimi bu qaydada oynayaq, daha sonra isə hücumameylli futbolçuları meydana buraxaq. Amma alınmadı".
O, məğlubiyyətə baxmayaraq komandasına təşəkkür edib:
"Meydanda azlıqda qalsaq da, xarakter göstərdik. Futbolçular məğlubiyyətlə barışmaq istəmirdilər".
Təcrübəli baş məşqçi Adil Nağıyevin aldığı qırmızı vərəqənin yersiz olduğunu vurğulayıb:
"Düzdür, onun meydanda qalması nəyisə dəyişməyəcəkdi. Bu hərəkətini heç bəyənmədim, özünə də etirazımı bildirdim. Amma cəza verilməyəcək".
Mütəxəssis görüşün baş hakimi Əliyar Ağayevin idarəçiliyinə də toxunub:
"Referinin gözündən qaçan xırda epizodlar sonda fəlakətə gətirib çıxardı. Bununla belə, ümumi hakimlik yaxşı səviyyədə idi".
Diniyev hazırda turnir cədvəlinin sonuncu pilləsində yer alan komandasının Premyer Liqada qalmaq şanslarını da dəyərləndirib:
"Qarşıda beş oyunumuz var. Şanslarımız davam edir. Bundan yararlanmağa çalışacağıq. Kubokda mübarizəni dayandırdığımız üçün rotasiyalar da geridə qaldı. Bundan sonra həftəlik tsiklə düşəcəyik. Əsas heyət üzvləri oynadıqdan sonra nəticə də olacaq. İnanıram ki, Qəbələdən uğurlu nəticə ilə qayıdacağıq".