Alıyev Avropa Çempionatında 7-ci oldu

11:34 12 Aprel 2015

Aprelin 9-18-də Gürcüstanın paytaxtı Tiflis şəhərində keçiriləcək ağır atletika üzrə kişilər və qadınlar arasında Avropa çempionatına start verilib.

 

Sportarena.az xəbər verir ki, bu yarışda 38 ölkədən 268 ağır atletin (112 qadın və 156 kişi) iştirak etməsi gözlənilir.

 

Turnirdə Azərbaycan yığma komandasının üzvləri də çıxış edirlər. Onlardan ilk olaraq Elmar Alıyev körpücük üzərinə çıxıb. O, 56 kq çəki dərəcəsində mübarizə aparıb. Atletimiz birdən qaldırma hərəkətində ilk olaraq 107 kq-ın öhdəsindən gəlib. Təəssüf ki, 111 kq üçün sonrakı iki cəhdi də uğursuz olub və o, bu hərəkətdə 9-cu yeri tutub.

 

Elmar təkanla qaldırma hərəkətində də eyni cür mübarizə aparıb. O, ilk yanaşmasında 137 kq-ı ram edib. Sonrakı cəhdələrində isə əvvəlcə 142 kq, sonra isə 143 kq-lıq ştanqın öhdəsindən gələ bilməyib. Buna baxmayaraq, Alıyev bu hərəkətdə Avropanın 4-cüsü olmağı bacarıb.

 

Toplamda 244 kq (107+137) nəticə göstərən Elmar yekun sıralamada 7-ci yeri tutub.

 

Yarışda “Zirvə” Beynəlxalq İdman Klubu – Zirve İnternational Sport Clubs-ın nümayəndələri də iştirak edirlər. Onlardan biri artıq körpücük üzərinə çıxaraq uğur qazanıb. “Kişinyov-Zirvə”nin atleti Oleq Sırqi Avropa çempionatının qalibi olub. Moldovalı idmançı birdən qaldırma hərəkətində 113 kq-la 5-ci olsa da, təkanla qaldırmada daha yaxşı çıxış edib. Oleq 147 kq nəticə ilə həm bu hərəkətdə, həm də toplamda 260 kq-ı (113+147) ram etməklə qızıl medala sahib çıxıb.

 


Digər xəbərlər

Xəbər xətti