Sportarena.az
24 Mart 2017

Tofiq Heydərov: "...Nicatın getməsinə mane ola bilmədik"

12 Punto 14 Punto 16 Punto 18 Punto

Ağır atletika üzrə Azərbaycan yığma komandasının baş məşqçisi və “Zirvə” Beynəlxalq İdman Klubunun prezidenti Tofiq Heydərovun müsahibəsi.


– Azərbaycanlı atlet Nicat Rəhimov Qazaxıstan yığmasının heyətində Olimpiya çempionu oldu. Buna münasibətiniz necədir?

– Onu uşaqlıqdan tanıyıram və daim onu izləyən bir mütəxəssis kimi Nicatın ən güclülərdən ola biləcəyinə inanmışam. Ona həmişə dəstək olmağa çalışmışıq. Nicat bizim ağır atletika məktəbinin yetirməsidir. Azərbaycanın təcrübəli məşqçiləri sayəsində o, yeniyetmələrin arasında Avropa çempionu və Olimpiya Oyunlarının qalibi olub. Nicat Qazaxıstana gedəndə artıq böyüklər arasında belə medal qazanmağa hazır idi. Sadəcə, o vaxt şəxsi məşqçisi, həm də atası Əli Rəhimovun yığma komandanın baş məşqçisi Zlatan Vanevlə yola getməmələri idmançının Azərbaycandan getməsi ilə nəticələndi. Məhz bu iki məşqçinin bir-biri ilə ziddiyyəti Nicatın Azərbaycanı tərk etməsinə səbəb oldu. Belə hadisələrlə idmanda çox rastlaşırıq. Məsələn, Nizami Paşayev və Turan Mirzəyev də bir vaxtlar mətbuat konfransı keçirərək baş məşqçidən şikayət edib, Respublikanı tərk etmək istəyirdilər. O zaman onların qarşısını ala bildik, amma Nicatın getməsinə mane ola bilmədik. Atası Əli Rəhimovla dəfələrlə söhbət etdim. Dedim ki, “Zirvə” klubunda mükəmməl məşq şəraiti var və maaşla da təmin edib ona hər cür dəstək ola bilərəm. Çünki Avropa çempionu olub, yeniyetmələrin Olimpiya Oyunlarına getməyə bir həftə qalanadək “Zirvə” İdman Klubunun üzvü olub. Amma Əli Rəhimov çox incimişdi, məni danışmağa belə qoymadı.


– Atası iddia edir ki, Nicat Azərbaycanda qalsaydı, indiki uğuru əldə edə bilməyəcəkdi…

– Belə fikirlər həqiqəti əks etdirmir. Çünki respublikamızda idmana yaradılan şərait ən yüksək səviyyədədir. Sadəcə, əvvəllər baş məşqçilərimiz çox haqsızlıqlara yol verdiklərindən nəticələrimiz istədiyimiz kimi alınmayıb. Nicat yeniyetmələr arasında Olimpiya çempionu olduqdan sonra ona verilən mükafat Qazaxıstanda böyüklər arasında çempion olduqdan sonra aldığı vəsaitdən belə artıqdır. Yadımdadır, 150 min manat, həmçinin 75 min manat, eləcə də Prezident İlham Əliyev tərəfindən 100 min manat dəyərində olan mənzil verildi. Bu məbləğ Qazaxıstanın indi vəd etdiyi 250 min dollardan o vaxtkı məzənnə ilə artıqdır. Yəni Nicat Rəhimova yeniyetmələr arasında Olimpiya çempionu olanda Azərbaycanın ödədiyi məbləğ, indi Qazaxıstanın Olimpiya çempionu kimi ona verəcəyi vəsaitdən artıq olub. Yəni Azərbaycan dövlətinin, şəxsən Prezident İlham Əliyevin Nicat Rəhimova böyük maddi və mənəvi dəstəyi olub. Sadəcə, atası ilə baş məşqçi arasında şəxsi zəmindəki ziddiyyət bu arzuolunmaz vəziyyəti yaradıb. Respublikamızda ağır atletikaya yaradılan şərait dünyanın heç bir ölkəsində yoxdur. Nicatla birlikdə hazırlaşan, yaşca kiçik olan Firudin Quliyev, Elxan Əliquluzadə də güclü nəticələr əldə edə biliblər. Sadəcə, məşqçilərimizin səhvi ucbatından çətin vəziyyətə düşüblər.

– Nicat milli komandada ab-havanın yaxşı olmadığından da şikayət edib. Doğrudanmı, hər şey bu qədər pis idi?

– Deyilənlərlə razılaşmıram. Çünki biz bir ailəyik. Yığma komandada da bolqar və digər legioner idmançılarımız var. Hərə öz mentalitetinə görə hərəkətlər edir. Bunu mətbuata çıxarıb bütün komanda haqqında xoşagəlməz fikirlər söyləmək ən azı, haqsızlıqdır. Azərbaycan müstəqillik qazandıqdan sonra ağır atletika və boks qədər inkişaf etmiş idman növü yoxdur. Cüdoda, güləşdə və digər idman növlərində də uğurlu nəticələr qazanılıb. Hələ SSRİ dövründə bu idman növləri üzrə uğurlar əldə olunub. O vaxtlardan ağır atletikada Hafiz Süleymanovdan başqa nəticə verən idmançımız olmayıb. O da nəticəni digər dövlətlərdə yaşayarkən qazanıb.

– Hazırda ağır atletikanın inkişafı üçün ölkəmizdə hansı işlər görülür?

– Az qala hər il yeni Avropa çempionu yetişdiririk. 700-dən artıq ağırlıq qaldıran müntəzəm olaraq regional və beynəlxalq yarışlarda iştirak edir. Bütün regionlarda ağır atletika mərkəzləri fəaliyyət göstərir və Bakıda da Ağır Atletika Akademiyası inşa edilib. Xırdalan şəhərində də dünyanın ən mükəmməl ağır atletika təlim-məşq bazası mövcuddur. Ağır atletika təmayüllü “Zirvə” liseyi fəaliyyət göstərir. Qısa müddət ərzində federasiya, nazirlik və klublarımız tərəfindən bu idman növünün inkişafına 100 milyon manata yaxın vəsait ayrılıb. Açığı deyim ki, bu inkişaf bu gün bizə mane olur. Bizi istəməyən qüvvələr ağır atletikada düzgün inkişafı görüb süni yollarla qarşısını almağa çalışırlar. Amma buna nail ola bilməyəcəklər. Bizdə analoqu olmayan ağır atletika məktəbinin bünövrəsi var. Ümummilli lider Heydər Əliyev 1996-cı ildə Prezident İlham Əliyevlə birgə “Neftçi” İdman-Sağlamlıq Mərkəzinin inşa edilməsi və ağırlıqqaldıranlara ilk təlim-məşq bazasının inşası ilə bunun təməlini qoyub. Bu işdə federasiyamızın böyük əməyi var. “Zirvə” Beynəlxalq İdman Klubunun 12 dövlətdə ağır atletika klubları fəaliyyət göstərir. Bu gün Azərbaycan Ağır Atletika Məktəbi dünyada ağır atletikanın inkişafına dəstək olur. Bunu istəməyən daxili və xarici qüvvələr tez bir zamanda ifşa olunaraq üzə çıxacaq. Haqq-ədalət ağır atletikada da öz yerini tapacaq.

Tarix
13.08.16 [17:20]
* Xəbərə şərh yoxdur. İlk şərhi sən yaz

Adınız
E-mail adresiniz
Şərhiniz

Xəbər xətti

Facebook

Sorğu

Azərbaycan Premyer Liqasının qalibi hansı komanda olacaq?
 "Qarabağ"
 "Qəbələ"

Copyright © 2017 Sportarena.az
Saytı hazırladı: Five studio