Rusiyanın Vladiqafqaz şəhərində 22 yaşadək kişi və qadın boksçular arasında Avropa çempionatına yekun vurulub.
Sportarena.az xəbər verir ki, yarışın son günündə Azərbaycan millisinin lideri Məhəmməd Abdullayev final döyüşünə çıxıb.91 kq-dan yuxarı çəki dərəcəsində qüvvəsini sınayan boksçu həlledici görüşdə almaniyalı Viktor Yurkla üz-üzə gəlib. Abdullayev 5:0 (30:27, 29:28, 30:27, 30:27, 29628) hesablı qələbə qazanaraq Avropa çempionu tituluna yiyələnib.
Beləliklə, Azərbaycan millisi qitə birinciliyini 1 qızıl və 2 bürünc medalla başa vurub. M. Abdullayevdən öncə Rüfət Hüseynov (49 kq) və Cəbrayıl Yelekov (81 kq) 3-cü yeri tutub.
Qeyd edək ki, kişilərdən ibarət yığma komanda hesabında 38 ölkə arasında 4-cü nəticəni göstərib. Yarışda qızıl medallar da məhz 4 millinin hesabındadır. Rusiya boksçuları 7 dəfə (7-0-0) çempionluq sevinci yaşadıqları halda, digər 3 ən yüksək əyarlı mükafat Bolqarıstan (1-1-0), Ukrayna (1-0-3) və Azərbaycan (1-0-2) idmançılarının payına düşüb.