Portuqaliya millisinin futbolçusu Kriştiano Ronaldo Səudiyyə Ərəbistanının "Əl-Nəsr" komandasına keçməyə yaxındır.
Sportarena.az "Foot Mercato" nəşrinə istinadən xəbər verir ki, 37 yaşlı hücumçu klubla transfer danışıqları aparmaq üçün Ər-Riyad şəhərinə yollanıb.
Təcrübəli forvardın paytaxt təmsilçisi ilə anlaşacağı gözlənilir. Çünki hazırda onun başqa təklifi yoxdur.
Daha əvvəl Kriştiano Ronaldonun "Əl-Nəsr"lə 2,5 illik müqavilə imzalayacağı bildirilib. İddiaya görə, sözləşmə 2023-cü il yanvarın 1-də qüvvəyə minəcək. Ulduz futbolçunun illik 200 milyon avro, ümumilikdə isə 500 milyon avro qazanacağı vurğulanıb.
Qeyd edək ki, Ronaldonun son klubu İngiltərə "Mançester Yunayted"i olub. "Qırmızı şeytanlar" futbolçunun qalmaqallı müsahibəsindən sonra onunla yolları ayırıb.