"Atalanta"nın müdafiəçisi Merih Demiral qış transfer pəncərəsi zamanı komandasını dəyişə bilər.
Sportarena.az "Calciomercato"ya istinadən xəbər verir ki, türk futbolçu ilə iki klub yaxından maraqlanır. Onlardan biri "Mançester Yunayted"dir. Premyer Liqa təmsilçisi qarşıdakı günlərdə 24 yaşlı mərkəz müdafiəçisi üçün İtaliya klubuna təklif göndərəcək.
Merihlə maraqlanan digər klub isə "İnter"dir. A Seriyası təmsilçisi üçlü müdafiə sistemində oynamağı bacaran oyunçunu heyətinə qatmaq istəyir.
Berqamo təmsilçisi klubla müqaviləsi 2026-cı ilin yayına kimi olan Merih Demiral üçün 20 milyon avro tələb edir.
Qeyd edək ki, "Atalanta" Merih Demiralı mövsümün əvvəlində "Yuventus"dan transfer edib. Türkiyə millisinin üzvü komandanın heyətində meydana çıxdığı 13 A Seriyası matçında 1 qol vurub.