Azərbaycan cüdoçuları Avstriyada təlim düşərgəsində iştirak edir

18:47 9 Yanvar 2023

Azərbaycanın cüdo üzrə milli komandası 9-17 yanvar aralığında Avstriyanın Miteşil şəhərində təşkil olunan Olimpiya təlim düşərgəsində iştirak edir.

 

Sportarena.az xəbər verir ki, təlim-məşq toplanışına böyüklərdən və gənclərdən ibarət milli komandadan 27 kişi idmançı qatılıb. Qadınlardan ibarət milli komandadan isə 10 cüdoçu hazırlıqda iştirak edir.

 

1993-cü ildən bəri keçirilən təlim-məşq toplanışına dünyanın 45 ölkəsindən 700-dən çox idmançı qatılıb. Onların arasında reytinq cədvəlinə düşən ilk 7 idmançı, 14 Olimpiya çempionu, 5 Dünya çempionu və digər nüfuzlu turnirlərin qalibləri və mükafatçıları var.

 

Böyüklərdən ibarət yığmanın baş məşqçisi Riçard Trautman toplanışla bağlı bunları bildirib: “Yeni təqvim ilinin başlanğıcıdır və bu, ilin ilk rəsmi toplanışıdır deyə, buraya çox sayda reytinqli idmançı qatılıb. İdmançılarımızın Miteşil Olimpiya idman düşərgəsində iştirakları Portuqaliyada keçiriləcək qran-pri və Parisdə baş tutacaq “Böyük Dəbilqə” turnirlərinə hazırlıq məqsədi daşıyır. Həmçinin, bu təlim yeni strategiyalar və texnikalar üzərində işləmək üçün müsbət şərait yaradacaq”.

 

Cüdoçularımıza performans direktoru Mark van der Ham, böyüklərdən ibarət yığmanın baş məşqçisi Riçard Trautman, böyüklərdən ibarət yığmanın böyük məşqçisi Elçin İsmayılov, gənclərdən ibarət yığmanın baş məşqçisi Elxan Məmmədov, qadınlardan ibarət yığmanın baş məşqçisi Rəşad Məmmədov və qadınlardan ibarət yığmanın məşqçisi Elnur İsmayılov rəhbərlik edir.


Xəbər xətti