Azərbaycan Premyer Liqasında yeni mövsümdən 12 komandanın iştirak etməsi ilə bağlı hər gün müxtəlif fikirlər səsləndirilir.
Təbii ki, hər birimiz istərdik ki, çempionatın coğrafiyası genişlənsin, yarışmaçıların sayı çox olsun. Çünki bu, mübarizəni daha rəqabətli və maraqlı edəcək.
Sportarena.az xəbər verir ki, Sportinfo TV-nin aparıcı-eksperti Elçin Cəfərov bu mövzuyla bağlı maraqlı fikirlər səsləndirib:
"Bir neçə həftə bundan qabaq demişdik ki, səlahiyyətli qurumlar tərəfindən qəbul edilən qərarlar çox vaxt kağız üzərində qalır.
İndi də deyirlər ki, elitanı heç bir klub tərk etməsin, onlara əlavə olaraq 2 komanda da qoşulsun. Zaqatala, Naxçıvan da təmsil olunsun.
Bəs ədalətli idman prinsipləri necə olacaq? I Diviziona düşən olmursa, prinsipiallıq olmursa, nəyə lazımdır belə Premyer Liqa?
Sonuncu yeri tutan aşağı dəstəyə getməli, oradan isə Premyer Liqaya 3 komanda gəlsə, biz bunu daha düzgün yanaşma kimi qəbul edərik".