"Qarabağ” səviyyə baxımından az-çox “Zenit”lə müqayisə olunacaq komandadır. Onlar yalnız hücum və topa nəzarət edir. Yəni müasir futbol".
Sportarena.az xəbər verir ki, bu sözləri "Sabah"ın baş məşqçisi Murad Musayev Rusiyanın "Moskovski komsomolets" qəzetinə verdiyi geniş müsahibədə deyib.
Azərbaycan klublarının səviyyəsi barədə danışarkən rusiyalı mütəxəssis “Neftçi”, “Zirə” və “Qəbələ”nin də daha çox hücumda oynadığını söyləyib:
"Digər klublar oyunlarını daha çox müdafiədən qururlar. Ona görə də bunun necə çempionat olduğunu birmənalı deyə bilmərəm. Əgər ötən mövsüm Rusiya çempionatından daha açıq futbolun oynandığı turnir olduğunu söyləmək mümkün idisə, bu mövsüm vəziyyət dəyişib. Bir çox klublar öz taktikalarını yenidən qurublar".
M.Musayev bildirib ki, yarışda komandaların daha çox olması yaxşıdır:
"Mən bura gələndə demək olar ki, “Qəbələ”dən başqa bütün komandalar Bakıda yerləşirdi. İndi artıq “Şamaxı”, “Turan”, “Kəpəz” də var. Deyə bilərik ki, komandaların yarısı bölgələrdədir. Orada futbolu sevirlər. Oyunlara çoxlu tamaşaçı gəlir. İnsanlar üçün bu, bayramdır. Nə qədər çox komanda olsa, çempionatın özü də bir o qədər maraqlı olar. “Qarabağ”la ev oyunumuza on mindən çox insan gəlmişdi. "Qarabağ"ın avrokubokdakı ev oyunlarında isə azarkeş sayı 30 minə çatır. Onların “Qalatasaray”la xeyriyyə oyununa 55 mindən çox tamaşaçı gəlmişdi. İnsanlar futbolu sevirlər, amma çempionat oyunlarına gedənlərin sayı Rusiyadan qat-qat aşağıdır".