"Nyukasl"ın baş məşqçisi Eddi Hau hücumçular Kriştianu Ronaldo ("Əl-Nəsr") və Neymarın (PSJ) mümkün transferlərindən danışıb.
Sportarena.az BBC-yə istinadən xəbər verir ki, o, bu iddiaları təkzib edib:
"Biz belə oyunçularla müqavilə bağlamağa yaxın deyilik. Onlar dünyanın ən yaxşılarıdır. İndi biz transferlərə və maaşlara bu cür xərcləri ödəyə bilmərik. Ona görə də gənc oyunçular axtarıb inkişaf etdirməliyik.
Sahiblərin dəyişdirilməsindən sonrakı ilk gündən bu barədə fərziyyələr səslənir. Əsas ulduzların "Nyukasl"a keçəcəyini güman etmək təbii idi. Amma biz başqa yolla getdik. Bu cür transferləri maliyyə cəhətdən ödəyə bilmirik və biz lazımi oyunçularla müqavilə imzalamaq istəyirik. Ronaldo və Neymar öyük futbolçulardır. Biz Mən komandaya hansı istiqamətdə rəhbərlik etmək istədiyimi və transfer bazarinda nəyi edib-etməyə biləcəyimizi bilirəm".
Xatırladaq ki, Ronaldonun “Əl-Nəsr”lə müqaviləsində bu mövsüm başa çatdıqdan sonra onun “Nyukasl”a keçməsinə icazə verən bənd olduğu iddia olunur. Ancaq bu, klub Çempionlar Liqasına vəsiqə qazansa, baş verə bilər.
Qeyd edək ki, "Nyukasl" hazırda İngiltərə Premyer Liqasında 65 xalla 3-cü pillədə qərarlaşıb.