“Barselona”nın baş məşqçisi Xavi İspaniya La Liqasının çempionu olmaları haqda danışıb.
Sportarena.az “Marca”-ya istinadən xəbər verir ki, o, La Liqada qalan 4 matçda da qələbə qazanmağa çalışacaqlarını bildirib:
“Əla hiss edirik. Yaxşı iş gördük, fədakarlıq etdik. Azarkeşlər və klub buna layiqdir. Bu işlər sayəsində biz sabitliyə, təhlükəsizliyə nail olduq.
Möhtəşəm matçda qələbə qazanmaqla titulu təmin etdik. Biz gözəl oynadıq.
La Liqa çempionluğunu derbidə qazandıq, bu, qeyri-adidir. Bayram etmək olardı, amma başa düşürəm ki, biz evdə deyilik, ona görə də, rəqibə hörmətsizlik etmək olmaz. Özünü saxlamağın nə qədər çətin olduğunu başa düşürəm. Oyunçulara dedim ki, indi edə biləcəkləri ən yaxşı şey meydandan mümkün qədər tez çıxmaqdır.
Çətin anlar yaşadıq, tənqidlər çox oldu. Amma bu, “Barselona”dır və mən işlərin necə getdiyini bilirəm.
Qalan dörd oyunda da qalib gəlmək istəyirik. Biz artıq məqsədimizə çatmışıq”.
“Barselona” son turda “Espanyol”u səfərdə 4:2 hesabı ilə məğlub edərək, La Liqada çempionluğu rəsmiləşdirib.