PSJ-nin hücumçusu Kilian Mbappe keçmiş komanda yoldaşı Lionel Messi haqda danışıb.
Sportarena.az xarici KİV-ə istinadən xəbər verir ki, o, argentinalını futbol tarixinin ən böyük oyunçularından biri adlandırıb:
“Messi futbol tarixinin ən böyük oyunçularındandır. Onun kimi futbolçu komandanı tərk edəndə işlər yolunda getmir. Bir məsələni başa düşə və qəbullana bilmirəm: nə üçün bu qədər insan onun komandadan getməsini istəyirdi? O, Fransada layiq olduğu hörməti görmədi”.
Messi 2021-2023-cü illərdə Liqa 1 klubunda çıxış edib. O, Paris klubunun heyətində iki dəfə Fransa çempionu və ölkə superkubokunun qalibi olub.
Xatırladaq ki, Messi iyunun 7-də “İnter Mayami”yə keçdiyini elan edib.