Azərbaycan teleməkanının populyar futbol proqramlarından olan "TOP TOP"un növbəti buraxılışı efirə gedib.
Sportarena.az xəbər verir ki, verilişin aparıcısı Elçin Cəfərovun bu dəfəki qonaqları Məşqçilər Komitəsinin üzvü Böyükağa Hacıyev, korner.az saytının rəhbəri Saleh Arslan və azarkeş Firudin Rzayev olub. "TOP TOP"da "Neftçi"də baş verən son dəyişikliklərdən, Premyer liqa oyunlarından və milli komandamızın baş məşqçisi Robert Prosineçkidən danışılıb. Əməkdar məşqçi Böyükağa Hacıyev yenə maraqlı açıqlamaları ilə gündəmdə olub. Sadıq Sadıqovun "Neftçi"nin prezidenti postundan ayrılmasını nəinki flaqmana, Azərbaycan futboluna da ciddi zərbə vuracağını söyləyib: "Neftçi"yə bundan sonra Sadıq Sadıqov kimi rəhbər gəlməyəcək. Kluba başçılıq etdiyi qısa müddətdə 3 çempionluq, 2 ölkə kuboku, Avroliqanın qrup mərhələsinə vəsiqə qazanmaq kimi titulları əldə etmək hər prezidentin işi deyil. Onun "Neftçi"nin rəhbəri postundan getməsi nəinki flaqman, Azərbaycan futbolu üçün də böyük zərbə olacaq".
Qeyd edək ki, "TOP TOP" verilişi hər həftənin bazar ertəsi saat 20:00-da "CHATBOX" kanalında canlı yayımlanır. "CHATBOX" kanalını KATV kabel televiziyası şəbəkəsində və myvideo.az saytında izləmək olar.