Cari çempionatın sonunda güclü futbolçuları transfer etməyi qarşısına məqsəd qoyan "Xəzər Lənkəran" artıq iş başına keçib. Belə ki, ilk olaraq "Traktor Sazi"nin oyunçusunu iş başında görmək üçün Təbrizə gedən Yunis Hüseynov hələ də vətənə dönməyib. Amma bu hələ transfer fəaliyyəti istiqamətində görülən son iş deyil. Belə ki, may ayının ortalarında Afrikaya istedad axtarışına çıxacaq Elvar Quliyevlə Yunis Hüseynov burada da 3-4 futbolçu ilə danışıq aparmağı planlaşdırır.
Medianın gündəmini zəbt edən son xəbərlər "Xəzər Lənkəran" azarkeşlərini bir qədər sarsıtmışdı. Belə ki, yayılan xəbərlərə görə, guya Lənkəran klubu heç bir futbolçunu heyətinə cəlb edə bilməyəcək. Amma cənub klubunun rəhbərliyi bu məsələdə də çıxış yolu tapıb. Belə ki, transfer pəncərəsi bağlanandan sonra həyata keçiriləcək transferlərə UEFA heç bir məhdudiyyət qoymayıb. Çünki, qadağa yay taransfer dönəmini əhatə edir. Bu baxımdan qeyd etmək olar ki, "Xəzər Lənkəran" istədiyi futbolçu ilə razılığa gəlib, transfer pəncərəsi bağlanandan sonra müqaviləyə imza ata bilər.
Cavid ƏHMƏDOĞLU