Son zamanlar "Neftçi"nin uğursuz çıxışı və klub ətrafında yaranmış söz-söhbətlər səngimək bilmir.
SportArena.az olaraq, komandanın və Azərbaycanın ən güclü məşqçilərindən olan Böyükağa Hacıyevlə əlaqə saxlayıb, "ağ-qaraların" bugünkü durumu haqqında fikirlərini öyrəndik. Təcrübəli mütəxəssiz fikirlərini belə izah etdi:
"Hər şeydən öncə mən sizə bir sual verim. "Neftçi" Avropa Liqasının qrup mərhələsinə gələndə, dalbadal kuboklar, çempionluqlar qazananda heç bizim haqqımızda bu qədər danışılmadı. Amma "Qarabağ" bir dəfə qrupa düşən kimi az qala onları Azərbaycanın milli qəhrəmanı etmişdiniz. Niyə? Bax, mən sizdən soruşuram ki, niyə?
"Bu gün "Neftçi" əvvəlki uğuru, əvvəlki oyunu ortaya qoya bilmir. Baxın görün əvvəlki "Neftçi" ilə indiki "Neftçi"nin oyunu arasında nə qədər fərq var. Bizim vaxtımızda "Neftçi"də bütün işlər düzgün idarə olunurdu. Qısa zamanda 5-6 nəticə ortaya qoyduq. Bizim göstərdiyimiz nəticəni indiyə kimi Azərbaycanda heç bir klub ortaya qoymayıb, bundan sonra da çətin olsun. Bu gun "Neftçi"də ona görə problem yaranır ki, orada Sadıq Sadıqov kimi rəhbər yoxdur. Sadıq Sadıqovun zamanında klubun bütün məsələləri daha peşəkarlıqla və düzgün idarə olunurdu. Eyni zamanda bizim dəqiq işimiz sonda kluba böyük uğurlar qazandırırdı. Bu gün belə nəticə yoxdursa, səbəb bəllidir".
Cavid ƏHMƏDOĞLU