Avropa Liqasında mübarizə aparacaq “Neftçi” heyətini gücləndirmək niyyətindədi. SportArena.az xəbər verir ki, paytaxt klubu bir neçə futbolçu ilə danışıq aparır.
Baş məşqçi Arif Əsədovun “Neftçi”də israrla görmək istədiyi oyunçuların siyahısında birinci Ruslan Abışov qərarlaşıb. “Qəbələ” ilə müqaviləsi başa çatmaq üzrə olan milli komandanın üzvünə təklif göndərilib. Ancaq Abışov hələlik 6 il formasını geyindiyi klubun təklifini cavablandırmayıb.
Bununla bağlı saytımıza açıqlama verən Ruslanın meneceri və qardaşı Sərxan İbrahimoğlu geniş danışmasa da, məlumatı təsdiqləyib: “Qış transfer dönəmində də Arif müəllim Ruslanla danışmışdı. Amma Ruslan o zaman mövsümü “Qəbələ”də tamamlamaq istədiyini bildirmişdi. Bu dəfə hansı qərarı verəcəyini bilmirəm. Bir qədər gözləmək lazımdı”.
Qeyd edək ki, “Qəbələ”də icarə əsasında çıxış edən Ruslan Abışovun sabiq komandası “Rubin”lə bağlılığı da başa çatmaq üzrədi. Kazan klubu ilə sözləşməsi gələn ay başa çatacaq müdafiəçi azad agent statusuna malik olacaq. Bu isə Ruslanın karyerasını istədiyi klubda davam etdirməsinə şərait yaradacaq. apasport