Xəbər verdiyimiz kimi Almaniyanın Köln şəhərində keçirilən mötəbər yarışlarda "Neftçi İdman Klubu"nun iki idmançısı ölkəmizi layiqincə təmsil edib. Peşəkar boksçumuz Rauf Ağayev və uşu sandaçımız Fərid Mayılov rəqiblərini nokault vəziyyətinə salaraq inamlı qələbə qazanıblar. Mayın 11-də Azərbaycan idmançıları vətənə qayıdıblar.
Heydər Əliyev adına Beynəlxalq Hava Limanında onlar “Neftçi İdman Klubu”nun rəhbərliyi və idman ictimaiyyəti tərəfindən böyük coşqu ilə qarşılanıblar. Peşəkar boksçumuz Rauf Ağayev mətbuat nümayəndələrinə açıqlamasında bunları deyib: “Bu mənim üçün vacib qələbədir. Çünki rəqibim Xatsiqov əvvəlki illərdə boksçularımız Şahin İmanov və Ağası Məmmədova qalib gəlmişdi. Mən onu nokaut edərək, hər iki boksçumuzun qisasını aldım. "Neftçi İdman Klubu"nun rəhbərliyinə mənə göstərdiyi etimada görə minnətdarlığımı bildirirəm”. Almaniyada "World" kəmərini qazanan Fərid Mayılov da bu uğurunu davam etdirəcəyinə söz verib: "İlk dəfə olaraq qızıl kəmərə sahib oldum. Rəqibim təcrübəli və güclü olsa da, onu nokauta salmağı bacardım. Bizi bu qələbələrə ruhlandıran hər bir şəxsə, həmişə yanımızda olan "Neftçi İdman Klubu"na təşəkkürümü bildirirəm".