İspaniyanın “Atletik” (Bilbao) klubunun qapıçısı Qorka İraisos Avropa Liqasının III təsnifat mərhələsinin püşkünü dəyərləndirib.
İspaniya mətbuatına açıqlamasında rəqibləri haqda məlumatlı olmadığını deyən 34 yaşlı futbolçu onların Bakı “İnter”i ilə qarşılaşmaq ehtimalının daha böyük olduğunu bildirib:
“Rəqiblərimiz haqda danışmaq üçün onların cavab matçına baxmalıyam. “İnter”in mərhələ adlamaq şansı daha çoxdur. Çünki onlar rəqib meydanında – İslandiyada keçirilən ilk oyunda qalib gəliblər. Ancaq komandalardan heç biri bizə tanış deyil. Bununla belə, deyə bilərəm ki, bu komandalardan hansı ilə qarşılaşsaq, bizə güclü müavimət göstərəcək. Üstəlik, həmin ölkələrdə çempionat yaxınlaşır. Buna görə də rəqiblərimiz fiziki cəhətdən də yaxşı hazırlıqlıdır”.
İspaniyalı qapıçı III təsnifat mərhələsini keçmək üçün yaxşı şansları olduğunu qeyd edib: “Rəqibimizin kimliyindən asılı olmayaraq ilk görüşdə yaxşı nəticə qazanmalıyıq. Çünki cavab matçında uzaq səfərə çıxacağıq. Bizə səfərdə çətin ola bilər. İlk oyunda mərhələnin taleyini böyük ölçüdə həll etməliyik”.
Xatırladaq ki, “Ateltik” III təsnifat mərhələsində “İnter”- “Hafnarfyordur” cütünün qalibi ilə qarşılaşacaq.