Topaz Premyer Liqasının III turunun “Neftçi” - “Sumqayıt” oyununda stadiona giriş pulsuz olacaq. Sportarena.az xəbər verir ki, İsmət Qayıbov adına Bakıxanov qəsəbə stadionunda keçiriləcək qarşılaşmaya bilet satışının təşkil olunmaması səbəbsiz deyil.
Belə ki, matçın keçirilmə yeri görüşdən bir neçə gün əvvəl dəyişdirilib. Bu üzdən də istisna hal kimi matça giriş biletsiz olacaq.
“Neftçi”nin üzvlük kartına sahib olan azarkeşlərlə klub tərəfindən ayrı-ayrılıqda əlaqə saxlanacaq və onların stadionda yerləşdirilməsi təmin ediləcək.
Qeyd edək ki, AVRO-2016-nın seçmə mərhələsi çərçivəsində sentyabrın 3-də “Bakcell Arena”da keçiriləcək Azərbaycan - Xorvatiya matçı ilə əlaqədar olaraq, “Neftçi” – “Sumqayıt” oyunu bu stadionda baş tutmayacaq.