Avro-2016-nın seçmə mərhələsi çərçivəsində sabah Xorvatiya yığması ilə qarşılaşacaq millimizə fantastik mükafat vəd olunub. Sportarena.az xəbər verir ki, AFFA mümkün qalibiyyətə görə komandaya böyük məbləğ söz verib. Bu barədə Xorvatiya mətbuatı məlumat yayıb.
İddiaya görə, millimiz xorvatları məğlub yola salarsa, federasiya komandaya 3 milyon avro mükafat verəcək. Bu pulun futbolçu və məşqçi heyəti, həmçinin yığmanın digər işçiləri arasında bölüşdürüləcəyi yazılıb.
Qeyd edək ki, Azərbaycan - Xorvatiya oyunu sabah saat 21:00-da "Bakcell Arena"da keçiriləcək.