"Qələbə qazandığımız üçün çox xoşbəxtəm. Komandamız yaxşı çıxış etdi. Qarşılaşmadan 3 xalla ayrıldığımız üçün çox sevincliyəm."
Sportarena.az "Sport7.az"a istinadən xəbər verir ki, bu sözləri "Qarabağ"ın yeni transferi Samuel Armenteros Premyer Liqamızın 4-cü turunda "Xəzər Lənkəran"a qalib gəldikləri oyun haqda danışarkən deyib.
Ağdam təmsilçisinin heyətində debütünü qolla qeyd edən isveçli forvard ilk oyununda fərqləməyin önəmli olduğunu bildirib: "Debüt etdiyim üçün də çox xoşbəxtəm. Əlbəttə ki, hücumçu kimi ilk qolumu vurmaq mənim üçün önəmli idi. Özümü göstərmək üçün "Qarabağ"da oynamaq əla şansdır".
Armenteros qollarının ardını gətirmək üçün çox çalışmalı olduğunu qeyd edib: "Qolların sayını çoxaltmaq üçün çox çalışmaq lazımdır. Komandam üçün ən yaxşısını etməyə çalışacam. Qarşıda bizi "Tottenhem"lə çətin oyun gözləyir. İnanıram ki, özümüzü yaxşı tərəfdən göstərəcəyik. Ümid edirəm ki, komandam üçün yenə qollar vuracam".