"Neftçi"nin baş məşqçisi Samir Əliyev Topaz Premyer Liqasının 5-ci turu çərçivəsində "Xəzər Lənkəran"a qarşı keçiriləcək oyunöncəsi jurnalistlər üçün brifinq təşkil edib. Sportarena.az xəbər verir ki, "ağ-qaralar"ın çalışdırıcısı öncə bunları dilə gətirib:
"Digər oyunlara necə hazırlaşırıqsa, buna da o cür hazırlaşırıq. Hazırlıq normal keçir. Heyətdə problemlərimiz var. Aqil Məmmədov zədəlidi. Aylton isə cəzalıdı. Əsas heyətin 2 üzvü sabah oynamayacaq. Yəqin ki, qapıda Mixail Peskoviç dayanacaq".
- "Xəzər Lənkəran"ın heyətində 14 futbolçu var. Onların da böyük əksəriyyəti gənclərdi. Bu mənada sabahkı oyun haqda nə düşünürsüz?
- Düzdü, "Xəzər Lənkəran"ın heyəti gənclərdən təşkil olunub. Amma onlar ötən mövsüm bir yerdə oynayıblar, "bişiblər". "Neftçi"nin heyətində də gənc futbolçular çoxdu. Hər iki komanda əvvəlki qədər güclü heyətə malik deyil. Buna baxmayaraq, qarşıdakı oyuna maraq böyükdür.
- "Xəzər Lənkəran"ın zəifləməsi sizdə arxayınçılıq yaratmır?
- "Xəzər Lənkəran"ın zəiflədiyini deməzdim. İstənilən halda sabah bizi "Böyük oyun" gözləyir.
- Sabahkı oyunda nəyə ümid edirsiniz?
- Qələbəyə oynayacağıq. Hələ ki, xal qazanmağa çox çətinliklə nail oluruq. Amma buna borcluyuq. Sabahkı oyunda qələbə qazanmaq bizim üçün çox vacibdir. Bu oyunda qazanılacaq qələbə futbolçularımızda özünəinam hissini daha da artıra bilər. Dekabra qədər bu heyətlə oynamalıyıq. Qışda isə bir-iki yeni futbolçu almalıyıq. Böyük ehtimalla yeni transferlərimiz legioner olacaq. Qış qədər həm də hansı mövqelərin güclənməyə ehtiyacı olduğunu da müəyyənləşdirəcəyik.
- "Xəzər Lənkəran" azarkeşlərinin qarşıdakı oyuna buraxılmaması ilə bağlı qərarla bağlı fikirlərinizi bilmək istərdik...
- Bu qərara hörmətlə yanaşırıq. Amma bir halda ki, bu komandaların görüşlərinə "Böyük oyun" adı verilib, hər iki tərəfin azarkeşləri stadionda olmalıdır. Ümid edirəm ki, növbəti oyunlara qədər bu qərar dəyişər. Futbol azarkeşlər üçündür.
- Siz "Böyük oyun" statusunun özünü əvvəlki kimi doğrultmadığı fikri ilə razısınız?
- Böyük ölçüdə razıyam.
- Braziliyalı müdafiəçi Jayro barədə nə qərara gəldiniz?
- O, komandada qalacaq. Növbəti oyuna qədər sifariş edəcəyik.
- Komandaya yenidən legionerlər toplamağa başlamısınız?
- Xeyr. Daha çox gənclərə şans veririk. Amma gənclər də özlərini doğrultmalıdırlar.