Topaz Premyer Liqasının V turu çərçivəsində keçirilmiş “Neftçi” - “Xəzər Lənkəran” oyunundan əvvəl mükafatlandırma mərasimi təşkil olunub. Sportarena.az xəbər verir ki, Neftçilər Günü münasibətilə bütün neftçilər təbrik edildikdən sonra meydana “Neftçi”nin qocaman veteranlarından olan Nağı Babayev dəvət olunub. Bu il 80 yaşını qeyd etmiş veteran futbolçunu “Neftçi”nin Müşahidə Şurasının sədri Çingiz Abdullayev təbrik edib. Ona üzərində "80" yazılmış forma təqdim olunub.
Bu il 60 yaşları tamam olmuş veteran futbolçular - Səmədağa Şıxlarov, Oqtay Abdullayev və Əbdülqəni Nurməmmədova 60 nömrəli formalar hədiyyə olunub. Formaları Səmədağa Şıxlarova “Neftçi” PFK-nın Müşahidə Şurasının üzvü Səməd Qurbanov, Oqtay Abdullayevə “Neftçi” PFK-nın Müşahidə Şurasının üzvü Bəhram Bağırzadə, Əbdülqəni Nurməmmədova klubun icraçı direktoru Elnur Məmmədov təqdim ediblər.
Sonra bir müddət öncə “Neftçi” PFK-nın rəsmi Facebook səhifəsində keçirilmiş üzvlük kartları ilə bağlı yarışın qalibləri - Rəşad Fətiyev və Əli Həziyev meyançaya dəvət olunublar. Qalib azarkeşlərə “Neftçi”nin formalarını klubun idman direktoru Vəli Qasımov təqdim edib.