"Qarabağ" bu gün Azərbaycan Premyer Liqasının VI turu çərçivəsində əzəli rəqibi "Neftçi" ilə qarşılaşacaq. Bu oyun uzun müddətdən sonra Suraxanı qəsəbəsində baş tutacaq. Belə ki, saat 19:00-da başlayacaq görüş yeni təmirdən çıxmış stadionda keçiriləcək.
Sportarena.az xəbər verir ki, "Qarabağ" öz stadionuna qayıtdığı üçün bu matçda ajiotaj daha böyükdür. Klubun azarkeşləri artıq bu oyunda anşlaq etməyi düşünür.
Konkret olaraq "Qarabağ Ordusu" Azarkeş Qrupu matç öncəsi üzərinə "Qarabağ", "Azərsun Arena"ya xoş gəldin" sözləri yazılmış tortla stadiona gələcəklər. Azarkeş qrupunun rəhbəri Ramiq Quliyev "Qarabağ"ın futbolçuları oyun öncəsi isinmə hərəkətləri edərkən onlara tortu kəsməyi və ondan dadmağı təklif edəcək. Daha sonra bu tortdan komandanın məşqçilər heyətinə və digər fanklub rəhbərlərinə də veriləcək.
Qeyd edək ki, digər fanklubların da özünəməxsus addımları ilə yadda qalacağı gözlənilir. (Qaynar.info)
